Kòrsou – Dia 3 di mei próksimo ta tuma lugá e di 13 edishon di ENNIA Montaña Bike Classic, e evento lokal di siklismo mas grandi den aktualidat. Pa tantu e partisipante komo e públiko tin un programa di dibertishon prepará. Asina,  despues di e kompetensha, Gio Fuertísimo ta toka. Kontrali na añanan anterior tin solamente 1 kategoria: ‘Roadbike’.  Esaki ta nifiká ku ta solamente baiskel di kareda  por partisipá. Tin diferente kategoria di edat pa tantu dama komo kabayero. Manera ta un tradishon kaba, tur klup di siklismo na Kòrsou ta partisipá. Tambe for di eksterior tin interes pa e evento. Ta e kareda mas importante pa siklistanan lokal. E kareda akí  ta konta tambe pa por forma e selekshon nashonal pa Caribbean Championship. Espektativa ta ku e aña akí  sigur 100 siklista ta partisipá. Super Sensational Cycling Club ta organisá e kareda di baiskel akí. E evento ta kuminsá 2 or di mèrdia. E promé kareda di kompetensha ta kuminsá mitar di 3. Akinan partisipantenan te ku 14 aña ta kompetí pa un premio. Pa nan e parcours ta 3.2 km. Kuartu pasá di 3 e grupo di 15 aña i mas grandi ta kuminsá. E grupo Élite, e klase mas haltu den e kompetensha, ta kore 25 rònchi. E ruta ta kuminsá i kaba na misa di Montaña. Despues di e kompetensha representantenan di Bo Frei Agencies lo ta pará kla pa duna e siklistanan un masashi. E masashi grátis akí ta pa lòs e múskulonan doloroso. Tantu e partisipante komo e públiko lo por  disfrutá di un programa di dibertishon. Lo tin diferente stènt ku kos di kome i bebe. Tambe lo tin tribuna, antó e públiko lo por gosa di muzik ora Gio Fuertísimo duna nan presentashon. Durante e kareda di kompetensha un DJ ta toka. Ta otorgá premio entre mitar di 7 i 7’or di anochi. Edat mínimo pa partisipashon ta 9 aña. Por inskribí na Vista Bike Zeelandia te ku djasabra 2 di mei 5’or di atardi. Einan partisipantenan ta haña nan number di start. Partisipashon ta kosta 10 florin pa partisipantenan te ku 16 aña.  Partisipantenan di 17 i mas grandi ta paga 15 florin. Riba e dia di  kompetensha partisipantenan ta haña bòn pa un bebida deportivo i un pan ku stobá. Por haña mas informashon via numbernan di telefon 661 8808, 560 0063 i e página di Facebook ENNIA –Events.