Willemstad – yüli 2015: Djasabra último pa di tres bia ENNIA a tene su dia di penshonado. ENNIA a organisá un mainta ameno pa penshonadonan ku ta risibí un pago di penshun di e kompania di seguro. Ku e selebrashon akí ENNIA ke yama su penshonadonan danki pa e konfiansa ku nan a pone hopi aña largu den e kompania.

Gwendell Mercelina a presentá e programa di mainta. A trit e invitadonan un dushi desayuno i un wega di bingo eksitante. Despues e invitadonan por a gosa di un show di D’art. Di un manera spektakular e grupo akí a sa di kombiná baile folklóriko ku muzik tradishonal di Kòrsou. A pone algún penshonado den spòtlait ku un regalu i un bunita ramo di flor. “Awe huntu ku bosnan ENNIA ta selebrá “Dia di Penshonado”. Despues di a laborá hopi aña, awe boso ta gosa di un penshun bon meresí. Antó esaki ta kos di selebrá. Pabien! , sigun Ralph Palm, Presidente di Managing Board di ENNIA den su diskurso.

Aparte di un mainta dushi, tabatin tur oportunidat pa e penshonadonan hasi pregunta tokante seguro i PensioenPas, e karchi kuta duna deskuentonan faborabel spesial pa penshonadonan di ENNIA. Tambe e penshonadonan ku ainda no a entregá prueba ku nan ta na bida (Attestatie de vita), por a hasi esaki einan mes.

Un penshun di ENNIA ta entrada pa despues. Pa mas ku 65 aña kaba ENNIA ta hasi negoshi den mundu di seguro. Penshun ta entrada pa bo famia tambe, den kaso ku abo fayesé. Ta importante pa bo regla bo penshun bon. Pa mas informashon tokante produktonan di penshun di ENNIA, manera penshun di partner i pa wérfano, por tuma kontakto ku un di nos konseheronan, bo bróker òf ònlain www.ennia.com.