Ku dianan di karnaval na kaminda, ENNIA a kompilá algun tep i medida di prevenshon práktiko. Ku esaki e kompania di seguro ku ta hasi esfuerso hopi aña kaba pa promové prevenshon, ke kontribuí na un karnaval sigur i salú  pa un i tur. Ta distribuí e informashon pa kliente- i siudadanonan  na Kòrsou, Boneiru i Aruba via di e wèpsait di ENNIA, E-News i medionan sosial manera Facebook i Linkedln, di manera ku siudadano- i kompanianan por lesa i kompartí e informashon fásilmente.

Gilbert Martina, Senior Managing Director ENNIA: “Tur aña nos tur  ta warda ansiosamente riba karnaval, e fiesta mas popular i ku ta dura mas largu durante  aña. Ta nos deseo pa kompania- i siudadanonan disfrutá plenamente di e fiesta tradishonal úniko akí, ku tin un historia riku riba nos islanan. Na mes momentu  nos ke hasi tur hende konsiente di algun riesgo tambe. Aña pasá nos a informá nos klientenan kaba tokante e riesgonan ku ta oumentá durante karnaval pa loke ta  ladronisia di outo, kiebro den outo i aksidente di outo.  E ana akí nos ta dediká atenshon tambe na riesgonan manera  daño na oído, sobredósis di solo, deshidratashon, venenamentu ku kuminda, i kiko ta kosnan práktiko i preventivo ku bo por hasi pa evitá esakinan.

Prevenshon komo punto di enfoke.

Banda di desaroyá i bende produktonan moderno di seguro, prevenshon ta un punto di atenshon importante pa ENNIA. Gilbert Martina: “Nos ta sinti un responsabilidat grandi pa  ku nos komunidat. Bo por sigurá bo mes kontra daño i riesgo, pero prevení ta mihó ainda. Den kuadro di nos programa di prevenshon, tur aña nos ta organisá un seminario Prevent Now grátis i bon bishitá na Aruba i Kòrsou.  Huntu ku kuerpo polisial i Ministerio Públiko nos ta invertí den siguridat den bario tambe. Den temporada di Pasku i aña nobo  nos a dediká atenshon na iluminashon festivo sigur, i  kon ta atendé di forma sigur ku vürwèrk. Pa karnaval nos ta enfoká riba  siguridat i salubridat. Durante hinter aña nos ta kompartí informashon i tepnan preventivo via nos boletínnan di notisia i ENNIA su página di prevenshon riba Facebook.”