Willemstad: Djadumingu 26 di òktober último tabata tin e di 4 edishon di Luna Yen den bario. E biaha aki e’la tuma lugar na Kolegio Chaya Willems, den ‘representashon’ di  Punda. E hóbennan di Punda a sá di duna un show na nivel pa tur esnan presente. Den e siman di 20 pa 24 di òktober diferente hóben ku a inskribí nan mes na Luna Yen Punda tabata tin e oportunidat di haña tayer den e disiplinanan di baile, kanto i aktuashon. E dosentenan ku a tuma na nan enkargo pa instruí tur e hóbennan durante Luna Yen den bario ta Eduard Reineta (aktuashon), Rudaylison Doran (kanto) i Rouegean Cijntje (baile). Durante e atardi tabata tin presentashon di e hóbennan ku a bai pa e oudishon di Luna Yen, pero tambe di e muchanan. E chikitinnan tambe a mustra e públiko presente ku nan tin talento. Na final di e atardi tabata e hóben Chaina Dieudonne ku a resultá e ganadó di Luna Yen den bario di Punda. E hóben a duna un bunita presentashon di kanto. E premio di promé finalista a bai pa e grupo di hóben ku a duna un presentashon den aktuashon. E hóbennan aki tabata Shaheedy Aniceta, Michelle Kunst, Andres Herrera i Daymaris La Cruz. E di dos finalista a resultá e hóben Bryan Vanuiyten. E’la kapturá e atenshon di e huradonan ku su talento pa aktuashon. E kuerpo di hurado enkargá pa a saka e ganadó i finalistanan tabata John Nagtegaal (aktuashon), Jesushen Bokshoven(kanto) i Reuel Roger ( baile). Mester menshoná ku produktornan di Luna Yen ta impreshoná ku e entusiasmo i talento ku e hóbennan a bin ta demonstrá durante e último 4 simannan aki. Un biaha mas esaki ta mustra ku Kòrsou ta un isla yen di talento. Un danki spesial ta bai na spònsernan ku ta invertí den Luna Yen i asina den desaroyo di nos hóbennan. Esakinan ta Banco di Caribe, Ennia, Refineria Isla, Coca Cola, Auto City, Gobièrnu di Kòrsou, Teatro Luna Blou i La Tentashon. Pa e siman di 27 òktober pa 2 di novèmber Luna Yen lo ta den e bario di Sta. Rosa na kolegio Bellafaas Martis.  E tayernan lo tuma lugá entre mitar di tres ku sink’or. Tin oportunidat ahinda pa inskribí djaluna 27 di òktober.  Pa mas informashon tokante skema di bario i tayernan i oudishonnan bishita e página web : www.lunablou.com òf página di facebook Teatro Luna Blou. Tambe por yama Teatro Luna Blou na 462-2209.