Green Aruba- Europe Meets the Americas (GE-EMA):

ORANJESTAD – October– Siman pasa Renaissance Convention Center (RCC) tabata escenario pa e di cinco edicion di ‘Green Aruba’, participantenan consistiendo di cientificonan, inversionistanan, empresarionan y ehecutivonan di e mundo ecologico y di energia a bini hunto pa elabora riba e enfoke di e aña aki ‘Solucionnan Sostenibel’. Ademas di esaki ta e prome aña cu ta combina Green Aruba cu Europe Meets the Americas (GE-EMA). Haciendo e asistencia y atencion pa e conferencia aun mas grandi. E aña aki 158 compania ta participa y un total di 25 pais. Tur loke ta energia sostenibel, tecnologia sostenibel, infrastructura- y turismo sostenibel. For di tur angulo lo elabora riba e tema aki y a invita oradornan cu experticio riba tur e topiconan. Ademas di esaki a organisa algun oportunidad di combersacion B2B pa estrecha lasonan y cooperacion comercial entre e empresanan y paisnan participante.“Nos ta masha contento cu e aña aki un biaha mas RCC por a host e conferencia, e motibo mas grandi pa e satisfaccion aki ta cu nos mes como hotel ta practica un ‘green environment’. Nos por menciona por ehempel cu nos ta participa activamente na reciclahe; nos ta informa y educa nos empleadonan riba e importancia di reciclahe y di spaar energia den tur departamento di nos hotel”, esaki di acuerdo cu ehecutivo di mercadeo, Sra. Zugheila Lindeborg. Un otro compania cu ta directamente afilia na MetaCorp ta Ecotech. Aruba ta ampliamente conoci cu e servicionan di Ecotech- expertonan den e.o waste management, coleccion den desperdicio y reciclahe; siman pasa a haci introduccion di Ecogas durante di e Green Conference. Di acuerdo cu Sr. Freddy Kelkboom,”Ecotech y Ecogas lo traha hunto pa ofrece solucionnan sostenibel pa Aruba su medioambiente. Ecotech ta dump tur desperdicio na Ecogas, akinan lo procesa e desperdicio y lo separa locual ta reciclabel y e resto (RDF ) lo pasa pa e proceso di gasificacion. Compara cu otro companianan cu ta dump ilegalmente y esunnan cu lo sigui dump na e landfill di Parkieten Bos, Ecotech ta traha den forma determina pa aporta na un Aruba mas ‘berde’. Clientenan di Ecotech ta contribui grandemente na esaki”. Ademas di Renaissance Resort Aruba, MetaCorp y su otro subsidiarionan tambe tin maneho di energia cu ta cuadra perfectamente cu e ideologia di ‘Green Aruba’. Haci e ‘switch’ pa un ‘green environment’ no ta pasa den un frega di wowo, e ta tuma su tempo y preparacionnan. Tur hende mester compronde y por adapta na e practica di un movemento ecologico, p’esey un conferencia asina’ki ta masha importante. E tema di 2014, ‘Solucionnan Sostenibel’ ta pone enfasis riba esaki. Ta un placer di por tin tur e key-note speakersnan den e conferencia y asina mantene nos comunidad y tur esunnan directamente envolvi cu un maneho energetico sostenibel debidamente informa.