Mas òf menos 40 mucha a partisipá na e proyekto arte di resiklahe di EY

Willemstad – Trabou boluntario durante di EY Connect Day ta duna empleadonan di EY e oportunidat di den oranan di trabou pasa tempu ku nan koleganan den un otro ambiente i alabes e chèns pa krea un mihor komunidat (“Building a better working world”). Durante di e evenemento aki e muchanan di skol Angela Jessurun / Chema Maduro a disfrutá di un atardi interaktivo i edukashonal. Na aña 2010 ‘EY Americas’ a lansa e evenemento anual, EY Connect Day, un dia riba kual tur establesementu di EY na Merka ta organisá un proyekto boluntario ku e meta pa kontribuí na un komunidat mas konektá. Riba 25 di sèptèmber EY Curaçao a selebrá su di dos EY Connect Day. Durante e evento aki aña pasá, EY Curaçao a organisá weganan olímpiko di EY pa hobennan di Fundashon Kristal. E tema ku a ser trata e aña aki tabata resiklahe i nos medio ambiente. Den e simannan promé ku e evento, e hobennan di skol Angela Jessurun / Chema Maduro i trahadonan di EY a risibí algun informashon i tep balioso riba e tema aki. Empleadonan di EY i mas òf menos 40 mucha di skol Angela Jessurun / Chema Maduro den bario di Montaña, a partisipá huntu na e weganan ku e tema resiklahe i na e proyekto di arte di resiklahe.

E tabata un evenemento ameno, interaktivo i edukashonal den e ambiente kreativo di Old School Windsurfers Village na St.Jorisbaai. E atardi a kuminsá ku un ‘quiz’ edukativo sigí pa diferente wega tokante resiklahe. E atardi e kulminá ku arte di resiklahe kaminda den un duo di un hoben i adulto a krea un obheto di arte di resiklahe úniko ku materialnan kolektá na St.Jorisbaai dirigí pa artista di resiklahe Roberto Tjon A Meeuw. Esaki ta pa stimulá formashon i kreatividat artístiko di e hobennan. 

Promé ku e muchanan a bai kas ku e obra di arte ku nan a yuda krea, EY Curaçao tabatin un último sorpresa. Un chèk a ser entregá na skol Angela Jessurun / Chema Maduro pa kompra di material pa skol.