Willemstad – E frances Geatan Fetaud a bolbe gana ENNIA Curaçao International Triathlon. Djadumingu último Fetaud tabata e promé ku a yega final den un tempu di 2 ora, 3 minüt i 57 sekònde. Marlies Kort a bira kampion di Kòrsou den kategoria di dama ku un tempu di 2 ora , 17 minüt i 11 sekònde. Den kategoria di hende hòmber pa kampionato di Kòrsou Casper Camps tabata esun mas rápido i a kompletá e 1.5 km di landamentu, 40 km di kareda di baiskel i 10 km korementu duru den 2 ora, 22 minüt i 36 sekònde.

ENNIA Curaço International Triathlon ku ya kaba tradishonalmente ta tuma lugá riba tereno di Santa Barbara Beach & Golf Resort, ta konosí komo un desafio i hopi pisá. E aña akí e organisashon a disidí pa laga e kompetensha kuminsá mei ora mas trempan, di manera ku e triatletanan ta eksperensiá ménos molèster físiko. I ku éksito. E rubiano Renze Postma a kaba na di 2 lugá komo ganadó overòl den kategoria di hende hòmber ku un tempu di 2 ora, 5 minüt i 26 sekònde. E ganadó di ENNIA sprit Triathlon Jeritsandro Martien tambe a presta bon. El a terminá na di 2 lugá den kategoria di hende hòmber pa loke ta kampionato di Kòrsou. Banda di e karanan konosí ku tur aña ta partisipá, e aña akí pa promé bia tabatin atletanan di Aruba i Grenada ku a partisipá. Prinsipalmente e kompetensia fuerte for di Aruba a hasi e triatlòn hopi eksitante.

Koninklijke Marine a haña sostén valioso di Curacaose Militie. Banda di ENNIA, Koninklijke Marine i Curacaose Militie, e evento akí a bira posibel tambe ku partisipashon i hopi sostén di Santa Barbara Beach & Golf Resort, Mijnbouwmaatschappij, Powerade i tur e boluntarionan indispensabel ku tur aña di nobo ta mèldu fielmente. Pa e skornan kompletu, bishitá http://triathlon-curacao.com/olympic/2015/results.html.