WILLEMSTAD:- Ya kaba ta pendiente pa selebrashon di Sinterklaas.  E amigu di tur mucha ta yega Kòrsou dia 15 di novèmber próksimo- pero dia 29 di novèmber e tin un sita na Renaissance Mall & Rif Fort entre 3’or i 6’or di atardi. Manera tur aña ta e kaso, huntu ku su Pietjesnan e lo bishitá e muchanan na Renaissance Mall & Rif Fort i hasi e atardi unu plasentero. Tur mucha di Kòrsou ta keda kordialmente invitá pa bini huntu ku famia kompletu i selebrá e dia. Durante di e dia festivo aki Renaissance Mall & Rif Fort lo wòrdu kombertí den un sentro di dibertishon pa nos muchanan. Sinterklaas i su Pietjesnan lo tei presente pa duna un show tur afó kombiná ku diferente wega atraktivo. Tambe lo tin oportunidat pa Sinterklaas i su Pietsjesnan hasi entrega di regalo riba e dia aki. Mayornan ku ta deseá pa Sinterklaas hasi entrega di regalo por yama departamento di Marketing di Renaissance na 435-5023 promé ku djamars dia 18 di Novèmber, 2014. Djasabra, dia 29 di Novèmber próksimo entre 3’or i 6’or di atardi hasié un dia di famia na Renaissance Mall i Rif Fort. Sinterklaas i su Pietsjesnan lo sòru pa un dia ameno na unda ku tur mucha lo dibertí. Tur mucha ta bon bini na Renaissance Mall i Rif Fort!