Konsierto ta wòrdu kombertí den fiesta bailabel …

WILLEMSTAD.- Despues ku a risibí notifikashon ku pronóstiko di tempu ta mustra ku lo tin posibilidat di áwaseru den e wikènt di 6 di yüli próksimo, e organisashon di Gio Fuertisimo no a tuma e riesgo i a tuma e desishon di kombertí e ‘Konsierto selebrashon 20 aniversario di Gio’ den un ‘Fiesta Grandi’ den sala di eksibishon di WTC. ‘Fiesta Grandi’ lo bai konta ku un sala kompletamente dekorá, ku efektonan di lus, skrin grandi, un sekshon di VIP i naturalmente músika di Gio Fuertisimo. Fanátikonan lo tin oportunidat di baila Gio ku tur e kantantenan ku a militá den e banda, fo’i Gio ’93 te ku 2013, Irvin Jano, Tico Libiee, Gibi Doran, Clarck Zalm, Roald Balentien, Dibo Doran, Djuric Virginie i Leandry Gonzalez lo perkurá pa tur e mihó éksitonan zona riba e anochi aki. Komo chèri riba e bolo lo tin presentashon di Tito Nieves kantando ku Gio i Sergio George riba piano. Pa hasi e ‘Fiesta Grandi’ aun mas speshal a pone 400 karchi na rason di 20 florin na puntonan di benta. Ora esakinan kaba e preis ta sigui subi. E sekshon di VIP lo inkluí tur kos. Bo ta paga 150 florin i lo por disfrutá henter e anochi di un sekshon spesial ku ta inkluí bibida i kos di kome. Karchinan di sekshon general ta na benta na Beep Beep Rio, 24 Uur uit de muur, Servei i na Radio Mas. Karchinan di sekshon VIP ta na benta solamente na Radio Mas.

Dia 6 di yüli 10 di anochi den WTC, ‘Fiesta Grandi Papa!’.