Bar, Restorant i Hotèlnan ku ta komersialisá World Cup lo tin ku paga. Establesimentunan ku ta akapará ménos ku 25 persona ta haña dispensashon.

TeleCuraçao a kumpra e derecho di transmishon pa televishon i FIFA a inkluí 4 derecho mas den e pakete. Esakinan ta:

•  Derecho di Televishon (den e kaso aki TeleCuraçao)
• Derecho di Cable (den e kaso aki TDS)
• Derecho di Radio (den e kaso aki TCFM)
• Derecho di Satelite (kual ta un derecho ku nos lo no hasi uso di dje)
• Derecho di Closed Circuit

Tur e derechonan aki ta konta tantu pa e teritorio di Kòrsou komo di Boneiru. Abogado sr. Karyl Bertrand a splika ku Closed circuit ta sirkuito será, esta tur negoshi i establesimentu públiko ku ta mustra weganan di FIFA di Mundial 2014 i ta hasi negoshi ku esaki, pues negoshinan ku ta propagandá e weganan i kobra pa entrada òf kobra pa kuminda i bebida. T’asina ku FIFA ta di opinion ku tur hende òf instansia ku ke hasi negoshi ku Kopa Mundial, mester paga derecho di Closed Circuit. Ta p’esei FIFA a inkluí e derecho di Closed Circuit Rights den e pakete di derechonan di TeleCuraçao. E tema aki ta hopi kompleho i hopi hende ta konfundí derecho di transmishon ku derecho di Closed Circuit.  Ta trata aki di dos derecho kompletamente separá. Hopi hende ta kere ku ora ku nan pasa un señal di futbòl ku no ta di TeleCuraçao den nan establesimentu, nan no tin ku paga, pero esaki no ta kuadra.  FIFA ta sali for di e punto di bista ku mester paga derecho di Sirkuito Será manera ku hasi negoshi ku Kopa Mundial, sin importá kua señal a usa. Señor Julius Koko lo ta enkargá ku registrashon di establesimentunan komersial ku ke hasi uso di e derecho di sirkuito será. Ta tarea i deber di kada establesimentu pa kumpli ku e derecho i registrá nan mes.

E tarifanan ta lo siguiente:

o    Establesimentunan di Horecaku ta akapará 100 kliente òf mas ta ANG 4500,-

o    Establesimentunan di Horecaku ta akapará entre 50 pa 100 persona ta ANG 3500,-

o    Establesimentunan di Horecaku ta akapará entre 25 i 50 persona ta ANG 2000,-

o    Establesimentunan ku tin kapasidat ménos ku 25 persona ta haña dispensashon.

• Personanan di kontakto i numbernan di telefòn: 7771651 òf 5178857.
• Por email tambe nafifa@telecuracao.com.
• Lo tin un tim di deurwaarder enkabesá pa Robertico Ramazan pa kontrolá e derecho di Closed Circuit durante e weganan.

 

Señora Jacqueline Bernabela lo ta esun enkargá ku registrashon di e establesimentunan na Boneiru. Ta tarea di kada establesimentu pa kumpli ku e derecho i registrá nan mes. E tarifa pa Boneiru ta lo siguiente:

o    Establesimentunan di Horeca ku ta akapará 100 kliente òf mas ta $2570

o    Establesimentunan di Horeca ku ta akapará entre 50 pa 100 persona ta $2000

o    Establesimentunan di Horeca ku ta akapará entre 25 i 50 persona ta $1145

o    Establesimentunan ku tin kapasidat ménos ku 25 persona ta haña dispensashon.

• Por tuma kontakto ku sra. Jacqueline Bernabela na numbernan di telefòn 5600705 òf 6900705.
• Por email tambe na fifa@telecuracao.com
• Lo tin un tim di deurwaarder enkabesá pa Sr. Silberie pa kontrolá e derecho di Closed Circuit durante e weganan.

TeleCuraçao, manera ya menshoná kaba, ta disponé tambe di e derecho di radio den su pakete di derechonan. Meskos ku ta e kaso ku Closed Circuit, FIFA ta konsiderá ku si bo ta nara e wega na radio i bende propaganda, esta hasi negoshi ku e kampeonato, bo tin ku paga derecho di transmishon. Pa FIFA no ta importá si bo a nara e wega for di TeleCuraçao, for di internèt òf for di Venevision.  Pa e solo echo kubo ta komersialisá e wega di futbòl, bo tin ku paga derecho di radio. TeleCuraçao lo pone e derecho di transmishon di radio optenibel pa tur radio na un preis abou òf kontra un barter deal. Sinembargo, a base di eksigensianan atrobe di FIFA, TeleCuraçao mester firma un akuerdo ku kada radio, pa garantisá ku kada radio na nan turno ta kumpli tambe ku e eksigensianan ku FIFA ta imponé riba TeleCuraçao. Ehèmpel di un di e eksigensianan aki ta ku no por transmití e narashon di radio via internèt. Pa regla e derecho di transmishon di radio por tuma kontakto ku TeleCuraçao na telefòn 7771651 òf email fifa@telecuracao.com.