Final di e sertámen Miss Kòrsou 2016 ta aserkando!


Si, djadumingu 2 di òktober Miss Kòrsou 2016 lo keda elegí. Coridja Stars Productions a sa di eduká, train i duna kada un di e 7 kandidatanan den 3 luna di tempu tur loke ta nesesario pa ta un embahadora digno di nos dushi país Kòrsou. Pa pueblo di Kòrsou por kaba di skohe nan faborito, Coridja Stars Productions ta duna boso e chèns pa konosénan mas di aserka i awe ta toka turno na kandidata number 2.

 

Nòmber: Liane Bonofacia

Edat: 24

Signo: Sagitario

Estatura: 1. 72

Midinan: 83-60-88

Okupashon: Sikólogo

Idioma ku por dominá: Papiamentu, Ingles, Spaño i Hulandes

Koló preferí: blòu

Kuminda favorito: BBQ ribs i Pesto òf Alfredo pasta

Pelíkula favorito: The Help

Liane Bonofacia tin 24 aña di edat i ta nase 7 di desèmber 1991 bou di e signo di sagitario. E ta e yu di mas chikitu biniendo for di un famia di 5 (mama, tata, ruman hòmber, ruman muhé i Liane). E bario di St. Maria ta kaminda Liane a krese promé ku e la bandoná su pais pa bai kontinuá su estudio na Hulanda. Na edat relativamente hóben Liane a eksperensiá kiko ta tentamentu na skol i apesar di esaki e la sa di para firme den su sapatu ku determinashon pa logra su metanan. Despues di kompletá su formashon na Maria Immaculata Lyceum, Liane ta emigrá ku “beursalen” pa Leiden kaminda e la studia Sikologia na Universidat di Leiden. Liane a terminá su estudio ku éksito na 2014 i ta remigrá su tera natal bèk pa e por duna un man na su komunidat.

Liane su vokashon ta:

  • Kontribuí ku su guia na nos komunidat: nos hende nan por i ke realisá hopi, ku debido guia nan lo por alkansá esaki
  • Pasenshi: nos por tin idea nan bunita pero sin pasenshi i determinashon esaki nan lo no kristalisá
  • Reflekshon: nos tin mag di ta krítiko pa ku nos mes si es ku nos ke alkansá ekselensia.  Despues di kada akshon nos para ketu pa evaluá kiko a bai bon i kiko nos por drecha, nos  Kòrsou tin speransa.

Aktualmente Liane ta traha komo sikólogo na Linkels & Partners i tambe ta aportá un granito komo “Thesis coach” na universidat di Kòrsou. Esaki ta e promé bes ku Liane a tuma kurashi pa partisipá na un sertámen di beyesa. Semper su focus tabata riba su estudio, konsentrando pa alkansá su meta nan profeshonal. Awor den su bida e ke reta su mes pa su desaroyo personal: e sertámen di miss Kòrsou ta kaminda Liane lo siña konosé su mes mas, sali for di su ‘comfort zone’  i realisá ku e ta un ser muhé balente, inteligente i ku karisma. Realisando e soño aki e ke inspirá hopi otro damita nan ku no ta importá unda bo ta para den bida, pero nunka ta lat pa bo asumí un reto pa bo desaroyo personal.liane-headshot liane-swimsuit