Si, djadumingu 2 di òktober Miss Kòrsou 2016 lo keda elegí. Coridja Stars Productions a sa di eduká, train i duna kada un di e 7 kandidatanan den 3 luna di tempu tur loke ta nesesario pa ta un embahadora digno di nos dushi país Kòrsou. Pa pueblo di Kòrsou por kaba di skohe nan faborito, Coridja Stars Productions ta duna boso e chèns pa konosénan mas di aserka i awe ta toka turno na kandidata number 3.

 

Nòmber: Sabrina Namias de Crasto

Edat: 20

Signo: Gemini

Estatura: 1. 70

Midinan: 79-62-91

Okupashon: Studiante di Lei

Idioma ku por dominá: Papiamentu, Hulandes, Ingles i spañó

Koló preferí: blòu

Kuminda favorito: Tur kos di laman

Pelíkula favorito: Titanic

 

Sabrina Namias de Crasto a nase 13 di jüni 1996 na Kòrsou. E ta bini di un famia di 4 (mama, tata I un ruman hòmber). Su fam ta di orígen ‘ Sefardíes´Hudio ku ta nifiká Hudio di Spaña. E Hudio ´Sefardíes´ tabata un grupo di Hudio ku tabata biba den Peninsula Iberica te ku anja 1492.

´Sefardíes´ ta wòrdu uza spesífikamente, pa e grupo di Hudio nan ku tabata biba den e tempu ey, i ku tabata biba den Peninsula Iberica.

Sabrina a bishitá Albert Schweitzer School i Radulphus College. Durante su estudio na Radulphus College e tabata tin e oportunidat pa biaha pa Hulanda, i konosé diferente universidat. Tambe por a konosé kon e bida di un studiante ta. Tòg Sabrina a skohe despues di a obtené su VWO diploma pa keda Kòrsou i kuminsá ku su estudio di Lei na Universidat di Kòrsou.

Sabrina gusta práktika diferente tipo di deporte. E tabata forma parti di e grupo Dansarte. Tambe e la praktiká Aikido, Kapap, Kick boxing, Crossfit i CKM. Banda di esakinan Sabrina ta gusta baila.

Deporte ta importante p’é. Hasiendo deporte e por siña abilidat, seguridat, responsabilidat i forsa fisiko. Sabrina ta deskribí su mes komo un persona outéntiko, spontan i hopi familiar. Su lema ta: ser felis i disfruta di presente.

Pa e sertámen di Miss Kòrsou Sabrina a traha mas riba su rutina físiko i ta bisa di a siña konosé su mes mas. E ta sigur di demostrá ku e ta kapasitá pa ta e próksimo representante di nos pais Kòrsou.