Si, djadumingu 2 di òktober Miss Kòrsou 2016 lo keda elegí. Coridja Stars Productions a sa di eduká, train i duna kada un di e 7 kandidatanan den 3 luna di tempu tur loke ta nesesario pa ta un embahadora digno di nos dushi pais Kòrsou. Pa pueblo di Kòrsou por kaba di skohe nan faborito, Coridja Stars Productions ta duna boso e chèns pa konosénan mas di aserka i awe ta toka turno na kandidata number 4.

 

Nòmber: Kim Martina

Edat: 19

Signo: Tauro

Estatura: 1. 60

Midinan: 82-58-86

Okupashon: Studiante di Bouwkunde

Idioma ku por dominá: Papiamentu, Hulandes i Ingles

Koló preferí: baby blòu i lila kla

Kuminda favorito: lasagne

Pelíkula favorito: The falt in our stars

 

Kandidata number 4 ta Kim Martina di 19 aña nasé na Kòrsou riba 6 di mei 1997.  Kim ta un dama super alegre, ku gusta ta den naturalesa. E ta gusta landa i pasa tempu na laman. Dor di esaki Kim a buska un deporte pa hasi ku tin di haber ku awa i landamentu. Kim a kuminsá praktiká waterbalèt na SDK den e grupo “MAKWAKU” te ku aña pasá.  Tambe Kim tin un amor grandi pa bestia, e la wòrdu lantá ku diferente bestia rondó di dje manera: galiña, puitu, kachó, konènchi, pushi, prikichi.

Despues di a kaba skol avansá Kim a disidí di sigui ku su estudio den un direkshon tékniko. Aktualmente e ta den su último aña na MTS studiando Bouwkunde. Kim tin planiá pa sigui ku su estudio despues di e aña aki na Universidat di Kòrsou.

Semper Kim tabatin interés den e mundo di beyesa. For di chikí e tabata kue su mama i wela su hilchinan bisti i kana rondó di kas ku tas bou di brasa.

Na 2013 Kim a partisipá den su promé sertámen di beyesa. E eksperensia tabata úniko i e la siña diferente kos. Den e sertámen aki Kim a logra bai ku e título di promé finalista i Miss fotogénika.

Kim su mensahe ta: no laga niun hende bisa kiko bo NO por hasi! Mustra ku bo por! No laga niun hende tene bo for di yega na bo soñonan. “Den mi kaso.. SI mi ta studiando bouwkunde i SI mi ta un hende muhé pero mi tambe por! I SI mi ta kòrtiku i hopi ta bisa “bo no por partisipá paso bo ta kòrtiku” pero wak unda mi ta awor aki! Mi a hasié pasó e ta un soño dimi.”
Kim ta spera di por inspirá tur hende, pa sigui nan soñonan i no laga nada òf niun hende tene bo atras!