Si, djadumingu 2 di òktober Miss Kòrsou 2016 lo keda elegí. Coridja Stars Productions a sa di eduká, train i duna kada un di e 7 kandidatanan den 3luna di tempu tur loke ta nesesario pa ta un embahadora digno di nos dushi país Kòrsou. Pa pueblo di Kòrsou por kaba di skohe nan faborito, Coridja Stars Productions ta duna boso e chèns pa konosénan mas di aserka i awe ta toka turno na kandidata number 1.
Nòmber:Chanelle de Lau
Edat: 21
Signo: Akuario
Estatura: 1. 80
Midinan: 87-61-93
Okupashon: Studiante International Business and Management(di 3 aña)
Idioma ku por dominá: Ingles, Hulandes i papiamentu
Koló preferí: Aqua
Kuminda favorito: kuminda italiano (Pasta, Pizza) i tur tipo di pasa boka
Pelíkula favorito: The Legend of Tarzan
Chanelle ta bini di un mama Hamaikino i un tata Hulandes i a nasé dia 5 di febrüari 1995 na Kòrsou. Pa Chanelle famia ta nifiká tur kos. Tambe e tin un amor grandi pa bestia i ta asta konosí den su bario ku tur kacho den nesesidat ku pasa na su kas ta haña kuminda i awa fresku.
Chanelle gusta kushiná i krea platonan nobo i diferente. Baile tambe ta un di su hòbinan, esaki e ta uz’é mas komo un medio pa relahá i tambe meditá. Chanelle a kuminsá baila ku 4 aña na Fina Dance Art School i a yega di presentá den vários presentashon lokal di balèt, jazz, hip hòp i tambe loke nan ta yama baile kontemporáneo.
Modelá tambe ta un hòbi di Chanelle i a kuminsá hasi esaki na e edat di 11 aña. E la yega di partisipá den kompetensia di modelahe lokal i a sali na di 2 lugá. Tambe Chanelle a yega di profilá riba pasarela tantu lokal den Curaçao Fashion Week komo internashonal den Mercedes Benz Fashion Week na Miami.
Chanelle ta ser konsiderá dor di su koleganan di skol komo un persona trabahador, direkto, un persona ku ta vosiferá su opinion honestamente i ku tin hopi konfiansa den su mes. Esaki ta karakterístikanan ku e la sa di desaroyá ku tempu, pasó na mas hóben Chanelle tabata bastante tímido i insigur.
Chanelle ta masha ambisioso den su desaroyo personal. E ta aspirá di ta un “motivational Speaker i tin su mes programa di televishon “talkshow” pa di e forma aki trese puntonan dilanti ku lo por hasi un diferensia den bida di otronan (motivá).