Dia 26 di yüni próksimo,Fundashon pa Maneho di Adikshon, FMA ta kumpli 20 aña di eksistensia. E fecha aki ta alabes dia internashonal kontra adikshon. Gerensia dje fundashon a disidí ku e aña ki lo no selebrá ku fiesta, pero lo duna komunidat un regalo mas duradero: un seri di treinen en konekshon ku adikshon na figuranan klave den nos komunidat, manera dòkter, lider di bario, pastor, polis den bario, empleado den sektor di salubridat i trahadó sosial. Ademas lo tin dia 26 un open house na ofisina di FMA na Sherasil, kaminda un i tur por sera konosí djaserka ku e trabou di FMA.

E fundashon a lanta na 1997 i riba enkargo di gobièrnu ta kordiná tur loke tin di aber ku (prevenshon di) adikshon na Korsou.

Ku e treinen nan un grupo di profeshonal mas grandi na Korsou lo tin konosementu di adikshon i alabes  FMA lo bira mas konosí den komunidat. Parti di e treinen nan a kuminsá kaba i intenshon ta pa nan klousurá ku un kongreso na yüni 2018. Nan ta forma parti di e vishon nobo di FMA , kaminda ke traha mas preventivo i ménos den direkshon di kuido: FMA ke enfoká mas tantu riba e persona (hóben) ku ta usa, pero ku no ta adikto ainda pasobra einan ainda por trese kambio den e komportashon adiktivo. E kuido pa adikto króniko ( ku hopi bes tin un malesa sikiátriko tambe) lo mester pasa e ora ei den man di instansia manera Klínika Capriles, ku ta mihó ekipá pa por duna nan e kuido nesesario.

Hóben  

Hóben nan ta forma e parti mas grandi di kliente na FMA i ta yega aki mayoria bes en konekshon ku uso di mariwana (33%)  i alkohol( 23%) . Pa loke ta alkohòl prinsipalmente por nota oumento den uso di   mixdrinks ku entre otro energy drinks. Otro supstansia/ kustumber adiktivo serka hóben ta kokaina, base, sigaria i  wega di plaka pero adikshonnan nobo manera shishapijp, internet, gaming, facebook i otro social media i selular tambe ta oumentando dia pa dia. Esaki ta trese kambio den komportashon di e hóben; nan mundu ta drai rònt di e selular, nan ta sera nan mes pa e mundu rondó di nan, nan no por drumi bon, no ke bai skol mas òf ta presta malu na skol ets.

Hopi skol na Korsou huntu ku FMA a implementá un maneho di ( prevenshon di) droga i adikshon na skol i nan ta dirigí e hóben pa tratamentu na FMA.  FMA ke logra un koperashon estrecho ku mas skol na Korsou i tambe ta hasi uso di su tim di peer- educators den esaki. Peer educators ta hóbennan  ku a sigui un treinen spesial pa por duna informashon na otro hóben tokante konsekuensia di uso di droga i alkohòl. FMA ademas a  e- organisá su departamento di hóben di moda ku awor por alkansá tambe e hóben ku no ta bayendo skol mas.

Finansa

Hóbennan no tin un instansia spesífiko pa sali na vanguardia di nan bienestar ora ta trata  adikshon. Esei ta un dje motibunan ku FMA ke enfoká mas riba e hóben. Pero tin un motibu finansiero tambe: e supsidio,aktualmente 2,3 mion pa aña  no a subi durante 20 añanan – al kontrario, a kòrta den dje ku 5%- miéntras  ku gastu pa keda drai durante añanan si a sigui subi. Anto e ora ei mester skohe. Pa tene kabes riba awa mester a retirá un parti dje personal i ta duna mas tratamentu den grupo i ménos individual. I ademas FMA ke skohe pa  traha ku hóben ku ta usando supstansha promé ku nan bira adikto króniko.

Adulto

Pa adulto tambe FMA ta ofresé tratamentu den grupo i aki ta trata prinsipalmente adikshon na alkohòl i kokaina. Pero tambe tin kliente  pa tratamentu kontra Mariwana, humamentu i wega di plaka.

For di un aña i mei ta duna mas edukashon i sosten tambe na famia di e persona adikto. Partner i yunan di e adikto ta esnan ku ta sufri mas bou di p.e. violensia doméstiko ku adikshon ta trese kuné. Hopi bes e  adikto mes no ta konsiente di e sufrimentu i daño ku e ta kousa. Ta e  famia ta esnan ku ta sostené e adikto pa e sigui den tratamentu i nan tambe ta grupo di enfoke pa FMA.

P’esei tin 3 grupo di sosten : 1 spesialmente pa mucha  di 8 te ku 12 aña, un pa famia di e adikto  i un grupo psiko- edukativo pa mayornan di hóben ku ta usa droga. Banda di e ofisina sentral na Oosterbeekstraat, FMA ta manehá  tambe e walk –in  pa adikto króniko, Dios Yudami den Skalo, kaminda ta ofresé kuminda, paña limpi i fasilidat pa baña i drumi.  Un tersera parti dje supsidio di FMA ta bai pa kuido residensial na Sentro Speransa den Otrabanda, kaminda adikto adulto i hóben por haña kuido mas intensivo.

Vishon nobo

E vishon nobo di FMA ta dirigí riba Edukashon, Prevenshon i Tratamentu ( anteriormente esaki tabata  “Kuida, Kura, Preveni”).

En konekshon ku e vishon nobo a diseñá un logo nobo ku tin un apariensia mas optimista i ku ta pone e hende mas sentral. No opstante limitashon finansiero, FMA semper a mantené kalidat di kuido riba nivel haltu i esei lo keda asina ku kambio di vishon.  En konekshon ku esaki lo organisá diferente kurso interno pa sigui alsa nivel profeshonal di e personal. For di yüni te ku novèmber di e aña aki tur empleado lo sigui e treinen “Konsehero den adikshon”  den kual lo trata e aspektonan médiko i sikiátriko di e malesa di adikshon, e komportashon adiktivo, dinamismo familiar, spiritualidat i métodonan pa duna asistensia.

ISO  

Pa miembronan di e staf lo organista próksimamente treinen en konekshon ku empowerment, komunikashon, metodonan pa subi produktividat , maneho di presupuesto i funshonamentu mas outónomo. Lo amplia e treinen nan aki pa tur departamento, inkluso nivel di maneho pa finalmente yega na introdukshon dje vishon nobo. En konekshon ku  upgrading dje kalidat di kuido, FMA ke logra e sertifikashon di ISO . Esaki ta un kaminda largu i ekstenso ku lo tuma bastante tempu, pero gerensia ta desidido den su meta pa garantisá e kalidat di mas haltu posibel den kuido di adkshon na Korsou.

E open house di FMA ta djaluna awor,  26 di yüni, di 12.00 te ku 17.00 or na Oosterbeekstraat 11, Sherasil. Pa mas infortmashon  tokante partisipashon na e treinen nan menshoná por tuma kontakto ku FMA na tel  461 5977