WILLEMSTAD- mei 2014:- No tin duda ku Kòrsou ta keda un destinashon ku ta kumpli ku tur deseo di e bishitante internashonal. Ofisina di Turismo di Kòrsou (CTB) ta anunsiá ku resientemente Santa Barbara Beach & Golf Resort Curaçao tabata anfitrion pa grabashon di un episodio di e programa deportivo ‘18 Holes’ di e kanal di televishon internashonal Fox Sports. E programa ‘18 Holes’ presentá pa Jimmy Hanlin, un profeshonal PGA i ganador di Golf Channel su ‘Big Break’ na 2010, ta un programa ku ta showcase e mihó kanchanan di gòlf i nan destinashon. Kòrsou ta marka e promé destinashon pafó di Merka ku e programa ta bishitá pa realisá grabashon di un di nan episodionan. E episodio graba na Kòrsou lo wòrdu transmití den simannan benidero. Ta bon pa menshoná ku ‘18 Holes’ ta wòrdu mirá den alrededor di 60 mion kas rònt Merka. Ademas di sera konosí ku e kancha di gòlf Old Quarry i disfrutá di e akomodashonnan luhoso di Santa Barbara Beach & Golf Resort Curaçao e tim di produkshon a bishitá nos sentro di suidat i Curaçao Sea Aquarium. CTB ta sumamente kontentu ku e oportunidat di promoshon ku Kòrsou a risibí i a hasi tur loke ta na su alkanse pa akomodá e tim di produkshon di Fox Sports. Grabashon di e programa ‘18 Holes’ sigur ta yuda posishoná Kòrsou komo un ‘Golf Destination’.  Un danki ta bai na e tim di Santa Barbara Beach & Golf Resort Curaçao i tur persona ku di un òf otro forma a yuda pa hasi e filmashon aki posibel.