…… Lo selebrá 10 aña NGN Brazz tokando ku Freewinds ……….

WILLEMSTAD –- Djamars awor dia 27 di desèmber, Freewinds lo tene su último konsierto grátis pa loke ta trata 2016. Na e okashon aki lo tin un kombinashon di un kantante lokal, den e kaso aki Farley Lourens i tambe e tremendo kantante di Dominica., Michele Henderson. Aparte di nan lo tei tambe e konosido kantante/kompositor David Pomeranz.

Manera ta konosí, Freewinds ya pa mas ku 27 aña a bin ta tene konsierto aki na Kòrsou den kua mayoria ta kompletamente grátis pa e públiko lokal partisipá. E biaha aki tampoko no ta eksepshon, na momento ku nan brinda e último konsierto di aña komo grátis.

Farley Lourens: Ta trata aki di un kantante ku no tin mester di introdukshon. Farley ta un kantante di un trayektoria largu ku a skibi su nòmber den arena musikal aki na Kòrsou, no solamente ganando Festival di Tumba tres aña sigui, pero a mustra di ta dominá tur género di músika. Farley huntu ku The Freewinds Band ta preparando algun kansion sumamente interesante  ku e públiko konosé.

Michele Henderson: Ta trata aki di un kantante di Dominica ku tur aña espesialmente fin di aña ta riba Freewinds i na momentu ku nan ta na Kòrsou, semper e ta probechá pa kanta algun kansion pa e públiko lokal. Algun aña pasa na momento ku Freewinds a monta un trailer i a bai toka den diferente bario na Kòrsou, Michele Henderson tambe a forma parti di e espektakulo aki. Ta trata aki di un tremendo kantante.

David Pomeranz ta un kantante kompositor ku a yega di skibi vários kansion ku a bira hitnan mundial. E tambe lo presentá ku kompañamentu di The Freewinds Band.

NGN Brazz: Ta trata aki di e tres supladonan lokal ku e aña aki na luna di desèmber a kumpli 10 aña tokando ku The Freewinds Band. Nan a kuminsá na 2006 hustamente den luna di desèmber tokando ku The Freewinds banda kompañando na e momentunan ei Debbie Beaujon.

NGN Brazz ta konsistí di Norman Kooks riba trompèt, Giovanni Atalita riba trombon i Norbert Girigorie riba saxofon,

ENTRADA GRATIS: Entrada pa e konsierto aki ta grátis.  Tin espasio pa 300 hende, pues esnan ku yega promé ta bebe awa limpi. Pa mas informashon por yama 513-0837.

SHOW TA KUMINSA MAS TEMPRAN: Ta bon pa tene kuenta ku e show di djamars awor dia 27 di desèmber ta kuminsá un ora mas tempran, esta pa 7 or di anochi. Portanan lo habri for di 6:30 pm i e show mes lo finalisá pa 8:30 mas tarda. Freewinds ta mara dilanti teatro Luna Blou.

For di aki nos kier a deseá pueblo di Kòrsou un Bon Pasku i ta spera esnan interesá, djamars awor dia 27 di desèmber for di 6:30 pm na bordo di Freewinds. Trahe ta nechi i desente. Si bo ta fanátiko di e artistanan aki, bo no pèrdè e tremendo show aki. Entrada ta grátis!