Fundacion Museo Arubano e entidad cu ta bay haci uso di Nicolaas Store. Ta asina cu Fundacion Museo Arubano lo bay huur e edificio monumental for di Stichting Monumenten Fonds.

Fundacion Museo Arubano ta e capa pa tur museo na Aruba funciona bou di dje. Na aña 2008, Berns Museum Management a crea un rapport na unda ta conseha museo, como departamento di gobierno, pa comberti den un fundacion. A crea un fundacion pa maneha tur e museonan na Aruba enbes di cada un riba nan mes. Awor ta asina leu cu nan a inicia e proceso pa percura cu asina e edificio ta cla por ranca sali.

Sra. Anky Vrolijk cu ta e director di Fundacion Museo Arubano ta comenta cu ya caba e mes conhuntamente cu Renwick Heronimo como persona encarga cu e diseño di coleccion y exposicionnan di museonan, a inicia cu e proceso. Sra.Vrolijk ta bisa: “Nos kier ta sigur di e contenido y den ki direccion nos kier hiba e museo aki.”

Intencion ta cu Nicolaas Store ta bay bira un museo pero tambe lo haya un cafetaria unda localnan por intercambia historia cu nos bishitantenan den e infrastructura historico aki y Fundacion Museo Arubano lo ta e motor tras di esaki.