Ta eksaktamente 1 luna pasá dia 1 di sèptèmber 2013 ku e tres hobennan Jurvis Lourens, Steven Cristina i Alton Paas huntu ku nan guiadó a regresá Kòrsou despues di tres luna di ehersisio intensivo na Carlsbad California. E promé stap aki di Fundashon Alton Paas sigur a hasi un impakto positivo na prinsipalmente e bida di e tres hobennan i tambe komunidat di Kòrsou. Despues di 6 luna di kampaña, fundraising, duna informashon na komunidat, Fundashon Alton Paas a logra realisá e promé 3 lunanan di e proyekto. Apesar di no a bai 6 luna kompletu tòg e aporte di organisashonnan i tambe komunidat a sòru pa un empuhe mas profundo serka e tres hobennan. E hobennan a mira progreso enorme durante e 3 lunanan i a subi e kaminda di preparashon pa nan bai kana. Fundashon Alton Paas ta rekonosé e balor di tur e logronan i ta konsiente ku ela yega asina leu ku yudansa di Dios i tambe pa medio di orashonnan di tur e siguidónan di e fundashon. Pesey djadomingu dia 6 di òktober 2013 Fundashon Alton Paas ta bai selebrá e logronan ku un santu sakrifisio di misa na Misa di Groot Kwartier pa 9’or di mainta pa yama danki i tambe duna oportunidat na tur esnan ku ke topa e tres hobennan. Aspetá esaki komo un invitashon personal. Nos ta warda bo!