Fundashon J.A.G. a duna homenahe na Baluarte i Pila di Karnaval 2018


Pa Karnaval  2018 Fundashon J.A.G. a tuma e desishon pa duna homenahe na un Baluarte i un Pila pa Karnaval 2018. I komo e Baluarte a keda eskohé sr. Orlando Cuales pa e parti di su aporte na Karnaval i Grupo Globo pa hopi aña i Maduro & Curiel’s Bank, komo e banko ku pa hopi aña, generashon tras di generashon a duna su aporte engrande na Karnaval di Kòrsou.

Maestro di Seremonia, sra. Ingelor Keller a introdusí sr. Juni Aniceta i sra. Minister Marilyn Alcala – Walle pa hiba palabra. Despues Rei di Tumba Hubenil a deleitá e presente nan ku su tremendo Tumba.

Despues sr. Cali Manuel a elaborá over di e bida karnavalesko di sr. Orlando Cuales i Grupo Globo, sigui pa palabranan masha bunita di sr. Cuales. Minister Alcala – Walle i Juni Aniceta a hasi entrega di e bunita regalo.

Pa 101 aña Maduro & Curiel’s Bank a aportá i duna tur su apoyo na pueblo di Kòrsou den diferente manera, su trahadó nan ta duna tur siman 2 ora di nan tempu pa trabounan boluntario, nan ta e empresa ku tin mas trahadó ku ta duna sanger tur luna na Banko di Sanger na Kòrsou. I asina tin hopi mas ku nan ta hasi tur dia pa Kòrsou.

Señora Jansen a tuma e regalo na nòmber di gerensia i personal di Maduro & Curiel’s Bank. I a bisa ku nan no ta hasié pa rekonosimentu, pero ta un honor pa ta huntu ku sr. Cuales den e homenahe aki. Un anochi super ameno, danki na The Trader ku a perkurá pa un tremendo trato pa ku tur invitado.