Djaweps mèrdia representante nan di Fundashon J.A.G., Fundashon Karnaval Banda Bou huntu ku Miembronan di Brantwer Kòrsou a duna tur informashon na prensa pa loke ta último detayenan pa Karnaval 2018, na Punda komo na Banda Bou.

Sr. Stanley Ignacio, kordinadó di Fundashon J.A.G. a diskulpa ku miembronan di Kuerpo Polisial mes no por tabata presente pa asina splika tur loke ta e punto nan di importansia pa ku e marchanan ku falta.

Shofùrnan di Vehíkulonan:

Tur vehíkulo mester ta di kùr, no ta asina ku ta dia di marcha e “Keurmeester” nan lo hasi esaki, si no ta e kaso lo saka e vehíkulo aki for di marcha. Tur vehíkulo mester tin dos shofùr, pa asina por kambia pa e otro por tuma sosiegu, of baha bai hasi kual kier diligensia. Papelnan mester ta na òrdu, rijbewijs, papelnan di Seguro tur esaki nan mester ta na òrdu sino lo saka e vehíkulo for di marcha. Tur vehíkulo ku tin spiker, òf ta un karosa mester tin un haltura te ku 3.80, no mas haltu ku esaki pa por pasa bou di viadukto. Despues di a sinta den un reunion di evaluashon ku e Kolaborador nan di Karnaval, a Sali na kla ku tin shofùr ku no ta sigui nan òrdu nan pa buena marcha di e Karnaval, I esaki ta trese opstákulo durante di e parada nan.

Ta hasi un súplika pa tur hende i tur vehíkulo prinsipalmente ta na salida 2 ora promé ku e marcha sali, ya asina e “Keurmeester”nan por hasi nan trabou i e marcha por sali na ora. Tur persona òf grupo ku tin un pèrmit pa sali dilanti promé ku e marcha mester mantené su mes na regla pa no opstakulisá e marchanan, si mester tuma nota ku tin un òf otro persona òf grupo ku ta hasi esaki lo saka nan for di e marchanan.

Miembronan di Brantwer Kòrsou:

Segun e miembro nan di Brantwer, tur vehíkulo i e stent nan kantu di kaminda ku ta bende i kushina kuminda mester tin un aparato pa paga kandela, “Brandblusser”. Esaki ta obligatorio i ta pa bo propio protekshon si algu mester pasa. Lo hasi kontròl promé i durante di marcha i si mester konstatá ku no tin un aparato lo saka e vehíkulo i sera e stent di bende kuminda. E kontròl nan aki lo ta for di djabièrnè te ku djamars.

Sr. Juni Aniceta tambe a hiba palabra:

Komo e presidente di Fundashon J.A.G., e a enfatisá ku despues di hopi kombersashon ku tur e Stakeholdernan a yega na e konklushon ku pa e aña aki lo no por organisá “Calle 9” mas. Pero e la primintí ku pa otro aña lo hasi tur posibel pa for di tempran tin tur kos kla pa por trese e aktividat aki bek. I pa esaki ta posibel mester tin koperashon di tur Stakeholders nan. Tambe e la trese pa dilanti ku pa djabièrnè awor, Marcha di Tiner ta sali 6’or atardi for di krusada Winston Churchillweg / Jan Noorduynweg dilanti di Pizza Hut ku e ruta di kustumber. Pa djasabra 10 febrüari tin Marcha di Banda Bou, sigui pa djadumingu 11 febrüari e Gran Marcha Grandi ku lo Sali 11’or enpunto for di krusada Winston Churchillweg / Jan Noorduynweg dilanti di Pizza Hut ku e ruta di kustumber.

Sra. Lisette Jansen di Fundashon Karnaval Banda Bou:

Senora Lisette a trese dilanti ku nan tambe ta kla pa e tremendo selebrashon di Karnaval di Banda Bou ku tur aña di nobo ta hala masha hopi públiko kantu di kaminda pa bin disfrutá. Pa djabièrnè 09 febrüari pa 9’or di mainta lo sali e Parada di Skolnan for di dilanti Hòfi Apostel na e Minimarket. Ku un kantidat di mas o ménos 3000 mucha ku skolnan di Banda Bou i pariba. Lisette kier a kòrda tur hende ku ta bini Banda Bou djasabra i ku tin e kustumber di para nan vehíkulo for di Seru Molina te ku Misa di Barber ku e aña aki esaki no ta posibel, dor di konstrukshon di e alsera kantu di kaminda ku no por i no ta permití pa subi ku outo einan. Pues bo mester bai parker bo outo na Vèlt di Barber. Pa djasabra ta sera kaminda 1’or di mèrdia i di Seru Molina te ku Misa di Barber for di mainta. Ta aksesibel pa yega via di Krakeel, Soto i Santa Cruz. Vehíkulonan mester tei 2 ora promé ku e Marcha ku ta sali 3’or di mèrdia for di Hòfi Abou.

Lisette ta hasi un súplika pa tene bon kuenta ku esaki nan i pa por tin un Karnaval eksitoso.

Sr. Juni a sigui informá ku djaluna 12 febrüari, pa 3’or di mèrdia lo tin Despedida di Mucha ku ta Sali for di Rotònde Plasa Hariri i lo terminá na Rotònde Lucinda da Cista Gomez. Pa 6’or pes tres ora despues ta saka Despedida di Tiner ku e aña aki lo bai tuma lugá pa promé biaha. Lo Sali for di Sta. Maria dilanti di Pizza Hut. A tene kuenta ku hopi aspekto i lo laga e bandanan musikal i e Dj nan ku ta toka den Marcha Hubenil i Marcha di Tiner sali promé huntu ku nan grupo dia di Despedida di Mucha pa asina nan por yega final i bai Sta. Maria pa djòin e grupo di Tiner ku nan ta pertenesé na dje.

Mayoria di e gruponan di Tiner lo partisipá e aña aki na e despedida, pero e otro nan a primintí ku pa otro aña nan tambe lo traha pa por partisipá na e Despedida di Tiner. Esaki ta un gran satisfakshon pa Fundashon J.A.G. ku por a duna un man pa yuda vários grupo pa partisipá na e despedida.

Juni Aniceta a sigui enfatisá ku pa e Parada di Tiner e aña aki lo bai tin tres stòp pa por presente nan Koreografia tradishonal. E promé lo ta dilanti di Direct TV 13, di dos lo ta na DOME, kaminda e lo pasa internashonalmente i e último ta na Tele Curaçao den Marchena. Lo no tin mas sitio pa duna show, e Kolaboradornan lo tin na nan enkargo pa tene e grupo na kada momento di e show pa no krea buraku den e marcha. Por último sr. Aniceta a trese dilanti ku e aña aki “Momo” lo ta na enkargo di Giovanni Abath i Gustavo Semeleer. Lo ta un Super Momo, pues keda pendiente. Entrega di premio ta plania pa dia 10 di mart huntu ku entrega di e Relato Finansiero, sitio i orario lo wòrdu anunsiá. Pa tur esnan ku kier un T-shirt di apertura di Karnaval 2018, esaki nan ta na benta na Sede di Fundashon J.A.G. na Havenstraat z/n pa solamente fl. 10. Hasi lihé pa no tin hopi mas. Fundashon J.A.G. huntu ku Fundashon Karnaval Banda Bou, tur e Stakeholdernan i Minister sra. Alcala – Walle ta deseá pueblo di Kòrsou un Felis Karnaval 2018………..#HUNTU.