Karnaval ta nos máksimo ekspreshon di alegria. Temporada di karnaval ta duna bida mas koló atraves di músika i kreatividat. Ku e ingredientenan manera rèspèt, toleransha i un aktitut positivo nos lo kosecha un felis temporada di karnaval 2014. Fundashon Karnaval Banda Bou tin na su enkargo pa organisá e karnaval di Banda Bou 2014. E tema di e karnaval di Banda Bou 2014 ta Streanan Briante. E programa di karnaval di Banda Bou pa 2014 ta lo siguiente: Apertura dia 12 di yanüari 2014, Elekshon di Reina Prens i Pancho grandi dia 14 di febrüari 2014, Elekshon di Reina Prens i Pancho hubenil dia 15 febrüari 2014 i marcha di Karnaval di Banda Bou dia 1 di mart 2014. Manera por nota den e programa, aña 2014 e elekshon di Reina, Prens i Pancho di Karnaval di Banda Bou lo ser repartí den 2 sertámen. Tur 2 sertámen lo tuma lugá na parke Himno i Bandera na Barber. Inskripshon pa e elekshon aki ya a habri. Partisipantenan pa e elekshon hubenil mester ta entre 8 pa 12 aña di edat i partisipantenan pa e elekshon grandi mester tin mínimo 16 aña. Interesá na partisipá òf ta deseá di risibí mas informashon? Manda un email na elekshonkbb@gmail.com i nos lo ‘reply’ bek ku tur informashon i un formulario di inskripshon.