WILLEMSTAD – Manera ya ta un tradishon Fundashon Mayor di Kriansa (FMdK ) e fundashon ku ta sòru pa 150 mucha ménos pudiente, ayera a pasa henter un dia ameno ku su muchanan na Aquar Oord aya na Lagun i aki e fundashon a hasi entrega di tur kos pa skol na e muchanan aki. Danki na diferente spònser manera Rotary Club ku a trèk gran parti di e proyekto aki ku hopi amor i dedikashon, Robuco, Margil Party Rentals, MCB, Changes i algun sponser mas ku a yuda ku e proyekto aki, e muchanan aki no solamente a haña tas i artíkulonan pa skol, pero tambe paña, unifòrm, kèts, tèrmu i trònchi pan, pues ku otro palabra tur loke nan tin mester pa kuminsá skol felis i kontentu. Fundashon Mayor di Kriansa a wòrdu fundá ku e meta pa brinda oportunidat sosial i oportunidat di desaroyo igual na muchanan ménos pudiente. FMdK ke logra esaki dor di konektá muchanan ménos pudiente na mayornan ku finansieramente por supsidiá un mucha. Mester bisa ku no solamente na komienso di aña eskolar e fundashon huntu ku spònsernan ta perkurá pa muchanan ménos pudiente, sino durante di henter aña nan ta haña pakete di kuminda i paña i tambe ta selebrá tur fiesta ku nan manera Sanikolas, Pasku, Pasku di resurekshon, kambio di aña etc.