WILLEMSTAD – Durante un biahe rònt mundu den kuadro di e proyekto ‘Setting Sail’ señor Luc Overtoom ta rekoudá fondo pa un investigashon ekstenso na Universidat VUmc na Amsterdam pa kombatí kanser. Dia 26 di yüli el a nabegá for di Amsterdam. Kòrsou ofisialmente ta e promé haf ku e ta bishitá den e kuadro aki. Fundashon Prevenshon ta preparando un bonbiní kaluroso p’e na su yegada aki. Djadumingu awor, 21 di desèmber alrededor di mitar di 10 mainta, e barku di bela SY CARDO ta drenta haf di Santa Ana, kompañá pa diferente boto i barku di bela privá. E nave ta mara na waf na altura di La Tentashon na Otrobanda. Fundashon Prevenshon ta usa e bishita partikular aki pa laga mas tantu hende sa di e programanan di prevenshon ku nan ta ehekutando ku éksito na Kòrsou. Profesor dr. Herbert (Bob) Pinedo, un di e fundadónan di Fundashon Prevenshon, lo ta presente na e momento di yegada. Un komitiva di bonbiní ta guia señor Overtoom i su tripulashon pa bai Fundashon Prevenshon su sentro di prevenshon na Klipstraat den Otrobanda. For di 2010 e sentro aki ta den operashon ku un investigashon di poblashon pa kanser di pechu i pronto ta kuminsá ku e investigashon di poblashon i e estudio sientífiko pa kanser na boka di matris. Den un seremonia ofisial kòrtiku lo para ketu na e importansia di koperashon internashonal riba tereno di kanser. Den e hardin bisiña di Museo Kurá Hulanda lo tin un ‘ban topa’ chikitu.

Biahe mundial

Originalmente tabata e pareha Luc i Trudy Overtoom ku a traha plan pa huntu hasi un gira rònt mundu. E plan aki a haña un toke diferente ora nan a konstatá kanser di pechu serka Trudy Overtoom. Pa hopi aña e tabata pashènt di profesor Pinedo. Tòg na 2011 señora Overtoom a fayesé. Pero señor Overtoom no a laga e idea di un biahe mundial muri i awor e ta tratando pa durante su biahe rònt mundu realisá koperashon internashonal pa kombatí e malesanan di kanser. E ta bishitá proyektonan di investigashon riba tereno di detekshon tempran i tratamentu di kanser na diferente sitio ku e ta pasa durante su gira mundial. Durante dos aña señor Overtoom ta nabegá ku e barku SY CARDO for di Amsterdam pa sinku siudat ku haf kaminda tin e proyektonan aki di investigashon. Fundashon Prevenshon ta invitá un i tur pa yama bonbiní señor Overtoom i SY CARDO na Otrobanda i pa bishitá e sentro di Fundashon Prevenshon. (Mas informashon: http://setting.sail.nl).