Entrante 1 di mei próksimo, Fundashon ROSA, e organisashon di pashèntnan ku STOMA ta lansa su proyekto pa generá fondo, ku e meta pa guia i prepará algun enfermera, pa nan por spesialisá i risibí mas konosementu kon pa atendé ku pashèntnan ku un STOMA. Pa hasi e proyekto aki posibel, Fundashon ROSA a risibí e bunita kolaborashon di Maduro & Curiel’s Bank N.V., Girobank, RBC Royal Bank, First Curaçao International Bank i Banco di Caribe, pa por pone diferente buzon di kolekta den e lokalidatnan di nan banko. Durante henter luna di mei, komunidat tin e posibilidat pa ora nan bishitá un di e filialnan di un di e bankonan menshoná, pa nan por depositá nan donashon i asina kontribuí pa realisá e proyekto aki, ku ta asina importante pa pashèntnan di STOMA na Kòrsou. Tur donashon ta bon biní.

Ken ta Fundashon ROSA

Fundashon ROSA ta e organisashon di pashèntnan di STOMA di Kòrsou i tin komo meta, pa stimulá un kondishon mas optimal posibel, tantu físiko, síkiko i sosial serka personanan ku tin un STOMA. Ademas Fundashon ROSA ta duna kuido i guia tantu promé komo despues di  operashon na tantu pashèntnan komo nan famia. Banda di esaki Fundashon ROSA ta sòru pa organisá charlanan pa su miembronan i na komunidat, pa dje forma aki trese mas konsientisashon riba e aspektonan ku un STOMA ta trese ku n’é i pa tur por hiba un bida muchu mas salú.

STOMA ta un salida artifisial pafó di barika pa kolektá sushi i/òf urina, ku ta ser poné serka un persona, ku pa motibu di un kanser i/òf polip òf un infekshon króniko na tripa òf dor di un fayo di nasementu, mester eliminá/kita parti di su tripa. Den e kaso aki ta traha un salida alternativa pa kolektá e sushi i/òf urina pafó di e barika.

Nos konosé 4 tipo di STOMA:

1. Colostoma ku ta un salida artifisial na e tripa diki;
2. Ileostoma ku ta un salida na e tripa fini (tripa delegá);
3. Urostoma ku ta un salida na e blas di urina;
4. Tracheostoma ku ta un apertura na garganta di un pashènt pa e por hala rosea via di dje.

   Mas i mihó kuido pa pashèntnan di STOMA

Ultimo tempu direktiva di Fundashon ROSA a konstatá un kresementu hopi grandi di pashèntnan di STOMA den komunidat. Pa por sigui duna e guia i sosten na tur e pashèntnan aki a bira nesesario pa e fundashon buska formanan mas efektivo pa generá fondo, ya komo ku e fundashon no ta risibí supsidio di gobièrnu i ku ta únikamente via di e donashonnan ku e ta risibí e por kubri su gastunan. Ta bin aserka, ku e organisashon ya no ta disponé mas di sufisiente enfermeronan spesialisá den STOMA. E último aki ta hasi e trabou di e fundashon mas difísil. Di e tres “Stomaverpleegkundige” ku e tabata disponé di dje, a keda únikamente unu, ya komo ku e otro dos a bai ku penshun.

Pa prepará su mes pa futuro i pa por guia i sirbi tur pashènt di STOMA di Kòrsou mas efektivo i mihó, direktiva a bin ku e proyekto “Mas i Mihó kuido pa pashèntnan di STOMA”, ku e meta pa krea fondo, pa por paga estudio i preparashon di 10 enfermero pa nan por spesialisá komo “Stomaverpleegkundige”. E preparashon lo sosodé lokal, ku spesialistanan riba e tereno aki. Fundashon ROSA ta konta riba generosidat di henter komunidat pa e por realisá e proyekto aki na benefisio di nos pashèntnan di STOMA i henter komunidat. Si abo ta un enfermero i bo ke spesialisá bo mes riba e tereno di STOMA, òf si bo ta deseá kualke informashon adishonal, por tuma kontakto ku señora Lourdes Fingal, Sekretaria di Fundashon Rosa na 562-8738 òf 462-8708.