Den kuadro di selebrashon di su 25 aña di eksistensia i alabes pa yuda rekoudá fondo pa e organisashon, riba djadumingu 2 di novèmber próksimo, Fundashon ROSA, e organisashon di pashèntnan ku un STOMA ta organisá un tremendo bazar. E bazar ta tuma lugá den edifisio di De Oleander situá na Weg naar Welgelegen, e edifisio pega ku JPF. Lo tin diferente artíkulo di obra di man ku e miembronan di Fundashon ROSA mes a traha na benta, meskos lo tin mata, kosnan di pasa boka i tambe diferente otro produkto na bon preis. Fundashon ROSA ke invitá tur hende pa bishitá e bazar, ya komo ku ta un bon oportunidat tambe pa komunidat por sera konosí ku e trabounan di Fundashon ROSA. Fundashon ROSA tin komo meta pa stimulá un kondishon mas optimal posibel, tantu físiko, síkiko i sosial serka personanan ku tin un STOMA. Meskos e ta duna duna kuido i guia promé i despues di  operashon na tantu pashèntnan komo nan famia dor di verpleegkudige speshalisá. Tambe Fundashon ROSA ta sòru pa organisá charlanan tantu pa su miembronan komo na komunidat, pa dje forma aki trese mas konsientisashon riba e aspektonan ku un STOMA ta trese ku n’e i pa komunidat hiba un bida mas salúdabel posibel. E Bazar ta di 10’or di mainta pa 4’or di atardi. Fundashon ROSA ke gradisí un i tur ku durante e 25 ananan aki a sostené e organisashon pa e por a logra su metanan.