Dia 26 di ougùstùs último, Fundashon ROSA, e organisashon di pashèntnan ku un STOMA a kumpli su 25 aña di eksistensia. Meta di Fundashon ROSA ta pa sali na vanguardia di tur pashènt di Stoma di Kòrsou. STOMA ta un konekshon artifisial pafó di barika pa kolektá sushi i/òf urina, ku ta ser realisá serka personanan, ku pa motibu di un kanser i/òf polip òf un infekshon króniko na tripa òf dor di un fayo di nasementu, mester eliminá/kita parti di nan tripa. Den e kaso aki ta traha un salida alternativa pa kolektá e sushi i/òf urina pafó di e barika. Meta di Fundashon ROSA ta pa stimulá un kondishon mas optimal posibel, tantu físiko, síkiko i sosial serka personanan ku tin un STOMA, ademas duna kuido i guia promé i despues di  operashon na tantu pashèntnan komo nan famia. Banda di esaki Fundashon ROSA ta sòru organisá charlanan tantu pa su miembronan komo na komunidat, pa dje forma aki trese mas konsientisashon riba e aspektonan ku un STOMA ta trese ku n’e i pa komunidat hiba un bida mas salú.

Programa di Selebrashon

Den kuadro di nan selebrashon, Fundashon ROSA a traha un programa pa asina laga komunidat sera konosí ku e organisashon i su logronan.

 

• 28 di sèptèmber pa 5 di òktober: Siman di Kultura

Durante henter e siman di 28 di sèptèmber pa 5 di òktober, di 10’or di mainta pa 4’or di atardi e Sentro di Rekreashon di Fundashon ROSA lo ta dediká na siman di kultura. Speshal pa e okashon aki lo tin un “Dia Habrí” den e sentro situá na Scharlooweg 23, kaminda tur hende por pasa i sera konosí ku e oragnisashon i su sentro di rekreashon i terapia;

 

• 30 di sèptèmber: Konsierto Benéfiko riba Freewinds

Dia 30 di sèptèmber 2014 Fundashon ROSA ta organisá un Konsierto Benéfiko na bordo di FREEWINDS ku e siguiente artistanan: Melania van der Veen, Farley Lourens, Dennis Cecilia, Liesella Thomas, Titania Willems, Kadir Snijder i naturalmente ku “The Freewinds Band”. Karchinan ta na benta na rason di naf. 40,00 pa persona i ta inkluí 2 snèk i un bebida. Pa informashon tokante karchi por tuma kontakto ku señora Lourdes Fingal, Sekretaria di Fundashon ROSA, na telefòn 510-3403 / 462-8708;

 

• Djarason 2 di òktober: Boutiso di Pòpchi

Riba djarazon 2 di òktober pa 10’or di mainta lo tin un boutiso di pòpchi, estilo di ántes den e Sentro di Rekreashon di Fundashon ROSA situá na Scharlooweg 23. Den pasado tabatin e kustumber ku ta boutisá pòpchi. E seremonia di boutiso di pòpchi tabata práktikamente idéntiko ku boutiso di un yu resien nasi. Hendenan tabata aktua komo pastor, yaya, madrina i padrino.

 

• Djadumingu 12 di òktober: Selebrashon ku Santu Sakrifisio di Misa

Na gratitut pa tur e logronan di e organisashon durante su 25 ana di eksistensia, riba djadumingu 12 di òktober pa 6’or di atardi lo tin un Santu Sakrifisio di Misa na Misa di Grootkwartier. Despues di Misa, di 7’or pa 8’or di anochi lo tin un resepshon na Pastorie di Misa di Groot Kwartier;

 

• 2 di novèmber: Bazar na Oleander

Riba 2 di novèmber 2014 Fundashon ROSA ta tene un tremendo Bazar, kaminda lo pone na benta produkto i artikulonan ku su miembronan mes a traha. E Bazar lo ta den e lokalidat di Oleander di 10’or di mainta pa 4’or di atardi.

 

Fundashon ROSA pa medio di esaki ke gradisí un i tur ku durante e 25 ananan aki a sostené e organisashon pa e por a logra su metanan.