Fundashon un Man pa Hubentut, e fundashon ku ta hasi trabou balioso na bienestar di muchanan den bario di Souax a kumpli 10 aña di eksistensha.  Na e okashon aki e fundashon ta tene un enkuentro dia 24 di novèmber ku tur e muchanan, algun di nan ya adulto kaba, ku a partisipá na aktividatnan despues di ora di skol serka e fundashon.  E enkuentro lo tuma lugá na e sede di e Fundashon na Souax di 3 or di mèrdia pa 6 or di atardi.  Lo tin vários presentashon di e hóbennan ku a i ta bishitá e fundashon su aktividatnan manera presentashon show di baile, músika di viol toká pe e hóbennan, “show” di drùmbènt i hopi mas. Fundashon Un Man pa Hubentut a nanse for di e pashon di su dos fundadónan, Sr. Rendy Speranza i Sra. Nardha Jansen, pa hasi algu pa e muchanan di bario, kendenan 10 aña pasá no tabatin ningun kaminda di bai despues di ora di skol sino di keda riba kaya. Awe, ámbos ku e mes un pashon i entusiasmo, riba un base diario ta ofresé un programa kompletu i bon strukturá pa no únikamente tene e muchanan for di kaya pero mas aun pa forma nan pa nan bira suidadanonan bon formá den nos komunidat. Un i tur, pero prinsipalmente tur e hóben i adultonan, nan famia i amigunan ta keda invitá pa bini e sentro di “Fundashon Un Man pa Hubentut”  na Soaux djadumingu dia 24 di novèmber próksimo entre 3 or di mèrdia pa 6 or di atardi pa huntu selebrá e 10 añanan di trabou balioso na bienestar di hóbennan di Soaux i bisindario.