WILLEMSTAD – Hasta promé ku fin di mei Sambil Curaçao a habri su portanan pa e públiko grandi, nan kuminsá konstruí kuater kancha mini di futbòl riba yerba artifisial, dos batting cages pa trein beisbòl. Anekso na esei lo bini mas despues un skina kaminda ta sirbi refresko, sèntwich i pasapalu na bishitantenan i e deportista pa rekobrá forsa.

Na e pais bisiña e kompania mama Metro Sport International ta pionero riba tereno di konstrukshon di kanchanan mini di futbòl di un largura di 38 meter i un hanchura di 18 meter riba un superfisie sintétiko ku ademas ta karga aprobashon di e federashon mundial di futbòl FIFA. Nan filial Metro Gol Curazao ya ta hopi lei ku konstrukshon di kuater di e kanchanan aki na e parti pabou di e kompleho di Sambil na Veeris konforme e normanan di kalidat di FIFA.

Hustamente pasobra beisbòl, banda di futbòl, ta un deporte hopi praktiká na Kòrsou, nan ta bai traha dos asina yamá batting cages kaminda por praktiká pa dal e pelota. E isla ya tin un reputashon komo un tanki bibero ku ta produsí streanan pa beisbòl profeshonal. Por menshoná komo ehèmpel hende manera Andrew Jones ku a gana dies Gold Glove den e sirkuito profeshonal na Merka. E peloteronan di Little League di Kòrsou ta distinguí tur aña den kompetensianan Karibense i Latino Merikano.

Asina ku e fasilidatnan aki ta kla i ta den uso, lo prepará un torneo di futbòl kaminda e timnan partisipante lo kompetí ku otro pa e Sambil Soccer Cup.

Ku otro palabra, Kòrsou su talentonan di futbòl i beisbòl por entrená na nan antoho na kaminda pa un karera profeshonal internashonal den nan ramo di deporte. Ku e fasilidatnan atraktivo adishonal aki Sambil Curaçao ta enfatisá un biaha mas kon e huntu ku su diferente partnernan ta sigui konstruyendo ‘Kòrsou di futuro’ i ku e ta representá mas ku simplemente un shopping mall.