WILLEMSTAD- Pa e partisipantenan di Miss Curaçao Teenager 2014, e anochi di djadumingu 4 di Mei último sigur tabata unu sumamente emoshonante. Despues di mas ku 3 luna di preparashon intensivo, porfin e partisipantenan tabatin nan promé anochi di presentashon kual tabata e sertámen di Gala of Beauty 2014″Cybernetic”. E anochi a kuminsá ku un kombersashon ameno entre miembronan di prensa lokal i e 8 partisipantenan. Durante e kòmbersashon aki prensa por a konosé kada un di e partisipantenan mas di aserka i skohe kua lo ta Miss Press 2014. E partisipante ku a wòrdu skohé dor di e miembronan di prensa pa e titulo aki a resultá di ta partisipante nr. 2. kende ta Kimberly Fernandes. E sertámen di Gala of Beauty, mas lat den e anochi, tabata un evento espektakular. Gala of Beauty 2014 tabata un anochi kargá ku beyesa, talento i muchu mas. Kada un di e partisipantenan a lusi di un manera impreshonante i huradonan sigur tabata tin un tarea sumamente difísil nan dilanti. Durante di Gala of Beauty tabatin diferente premiashon entre e 8 partisipantenan. Entre otro tabatin e premio pa The Most Beautiful Skin 2014 kual a bai pa partisipante nr 3. Rachel Bieré. E premio di Miss Curaçao Teenager Model Look 2014 a bai pa partisipante nr. 5 Chardonnay Verdaasdonk. Partisipante nr 4. Mynesha Reinita a bai ku e premionan di Most Beautifull Smile i tambe miss Personality 2014. Premionan di Most Beautiful Hair i Most Beautiful Face 2014 a bai pa partisipante nr 8. Seline Winkel. I aparte di e premio di Miss Press 2014 partisipante nr 2 Kimberly Fernandes a bai tambe ku e premionan di Most Dynamic, Most Beautiful Legs i Best Body 2014. International Beauty & Fashion Foundation (IBFF) siguramente ta sumamente satisfecho ku e manera kon e anochi aki a kana. Nos ta gradisí kada unu ku di un òf otro forma a hasi e anochi aki posibel. Awor trabounan ta bai sigui. E partisipantenan lo kontinuá den preparashon na kaminda pa 12 di Yüli 2014, kaminda un di e damanan aki lo wòrdu koroná komo nos Miss Curaçao Teenager 2014. Karchinan pa e anochi final aki ya ta optenibel na balor di 75 Fls. pa e sekshon VIP i 40 Fls. pa e sekshon general. Bo por buska dibo na Samsom, na kantor di IBFF na World Trade Center (688-1103 òf 510-6808) i serka kada partisipantenan individual. Tur kos ta pinta ku e kompetensia aki lo bai ta unu definitivamente pèrtá. Pues bini i apoyá e kandidata ku bo ta kere ta esun ku e aña aki lo mester bira nos Miss Curaçao Teenager 2014. Pa keda na altura di tur akontesimentu rondó di e sertámen final i e preparashonnan ku ta tumando lugá, kòrda “like” e página di Facebook di Miss Curaçao Teenager. E página aki ta wòrdu aktualisá kontinuamente ku tur informashon importante tokante tur charla i aktividatnan na kual e partisipantenan di e aña aki ta tuma parti na dje.