Willemstad- Ayera nochi a anunsiá e ganadónan di e kompetensia anual di potrèt Capture Curaçao di Curaçao International Film Festival Rotterdam 2015 (CIFFR15). Tantu fotógrafo hòbi komo esnan profeshonal por a sasia nan plaser den sinku tema: Doors – Food Steps – Survival – Glasses i Traces (blanku-pretu). Un hurado profeshonal di materia a skoge den kada tema un ganadó premio di hurado. Na e premio di hurado tin un suma mará di Nafl 750. E ganadónan di premio di hurado pa tema ta:

Doors                Doors to Nowhere di Hubert de Palm

Food Steps        Catch of the Day di Terrance Conradus

Survival            Losing the Game di J. Leeuwen

Glasses             Glasses are the Victory of Photographic Speed di Marc Wollrabe

Traces               Eye Opener di Gerffert Jansen

Pa e premio eskoho di Públiko tabatin en total 4865 voto riba e 50 potrètnan for di e selekshon di hurado. Ku no ménos ku 497 voto riba e potrèt Rain Traces e fotógrafo Tso-Jie Ng a sali elegí komo ganadó di e premio di Públiko. E premio akí: “Special Guest Photographer CIFFR 2015” ta enserá ku e komo fotógrafo ta haña atmishon pa eventonan spesial di e festival manera: pelíkula di apertura, Masterclass Jan de Bont, i diferente otro presentashon spesial, i ku esei un bista tras di kortina di e organisashon di e festival.

Por haña tur e fotonan entregá riba e website www.curacaoiffr.com bou di ‘Competities’. Durante e festival por mira tur e fotonan un bes mas riba un pantaya den e restorant di The Cinemas.

E di kuater edishon ta start djárason 25 di mart 20:00 or ku e sine di apertura The Dark Horse di direktor James Napier Robertson i ta dura te djadumingu 29 di mart. Buki di programa ta grátis optenibel na kaha di The Cinemas.