Agrupashon musikal GENTZ  TRE’CHIC ya no ta un banda musikal deskonosí.  Den un korto tempu nan a sa di subi riba merkado i gana kurason di pueblo.

GENTZ un agrupashon yòn i dinámiko ku un vishon pa engrandesé nos farándula lokal a sa di demostrá nan mes den un periodo di seis luna.  Por bisa ku GENTZ a wòrdu forma dor di músikonan ku tin ya algun aña kaba ta forma parti di e mundu farandulero i ku kier a bin ku un estilo nobo. Esaki netamente ta forsa di e banda kual por mira bèk den nan forma di presentá, nan amor pa músika, e dedikashon profeshonal i e tim sólido ku un “out of the box thinking” para nan tras.

Ya GENTZ a saka algun piesa riba merkado kual por wòrdu skuchá diariamente na diferente radio emisora. Ademas por bisa ku GENTZ ta ekstremadamente gustá na nos hermana islanan, Aruba kaminda nan a presentá vários biaha kaba i naturalmente Boneiru tampoko no a keda afó. Pa e aña aki GENTZ tin diferente presentashon den eksterior planiá kaba i pronto lo toka turno na Hulanda tambe pa sera konosí ku e agrupashon aki.

E disko kompakto tin un variashon musikal di nuebe piesa riba dje, di kual algun eksistente i naturalmente esnan nobo nobo ku no a wòrdu lansa ainda. Pues pa tur e fanátikonan di GENTZ, esnan ku gusta bon músika i esnan ku kisas no ta fanátiko di GENTZ ainda, akudí na bo diskobar preferí i solisitá pa e disko kompakto.

GENTZ TRE’CHIC ta yama danki na Chippie/Roaming pa nan konfiansa depositá i ta invitá un i tur pa disfrutá di e primisia di e kansionnan riba nan disko kompakto.

Pa informashon tokante GENTZ por bishita nan Facebook Fanpage of por mail na: gentzofficial@gmail.com