WILLEMSTAD —  E gimmik ku AMAK i Licores Maduro a organisá djasabra último, kaminda a pone un kantidat limitá di karchi disponibel na benta na un preis spesial, a resultá un éksito rotundo.

For di oranan tempran di djasabra mainta por a mira fanatikonan di Tumba a kuminsá ta line up pa asina ei ta esnan promé ku por hasi uso di e oportunidat ku AMAK i Licores Maduro a ofresé, esta kumpra karchi di entrada pa mira Festival di Tumba 2018 na un preis spesial. Na un manera nechi ordená, tur esnan presentá por a drenta den The Store na Licores Maduro i asina ei kumpra nan karchi di entrada pa Festival di Tumba ku ya ta kla.

Ta bon pa mustra ku e karchinan di entrada pa 2017 tin un barcode úniko ku ta keda di scan na momentu ku un hende drenta Curaçao Festival Center pa presensia e magno evento kultural di Kòrsou aki. E públiko ku a akudí masalmente a keda sumamente satisfecho pa e kambio di sitio i tambe e forma great ku nan a pasa, ku músika di tumba toka pa un DJ. Ya kaba por mira ku e ambiente di Karnaval a dal aden, aunke aña no a kambia ainda. Un danki spesial ta bai na tur esnan ku djasabra último a yuda den e kampaña aki, pero un danki super grandi na direktor di Licores Maduro Sr. Omar van der Dijs i tambe su crew. Festival di Tumba 2018 lo bira grandi.

Atentamente

Direktiva di AMAK