Willemstad- Girobank huntu ku Òinki a organisá un tremendo “speurtocht” pa su spardónan. E evento aki a tuma lugá den nos sentro di siudat pa muchanan di 6 te ku 12 aña, kaminda nan a rekreá, siña i dibertí. 

‘World Savings Day’ ta keda selebrá anualmente dia 31 di òktober. E dia aki a keda dekretá pa promé biaha na aña 1924, durante e promé kongreso internashonal yamá “International Savings Bank Congress (World Society of Savings Banks)’ na Milan, Italia. Akinan representantenan di 29 pais a bini huntu i kompartí ku mundu e importansia di spar den tur su aspektonan i tambe e relevansia i impakto ku esaki tin riba nos ekonomia i tambe riba kada persona individual.

Girobank, ku semper a enfoká riba e importansia di sparmentu den nos komunidat, a disidí pa kompartí e aspekto importante di bida aki ku nos muchanan tambe. Kada partisipante na e “speurtocht” aki a haña un bista kon pa atendé ku sèn en general. Tambe nan a haña algun pregunta ku ta trata nos sentro di siudat i tambe algun tarea pa desaroyá nan abilidatnan sosial i komunikativo.

E “speurtocht” a keda repartí den dos kategoria. E promé ta muchanan di 6 pa 9 aña i e di dos kategoria a konsistí di muchanan di 10 pa 12 aña. Di kada kategoria a saka 3 ganadó. E premionan a konsistí di sèn kèsh i tambe un montante ku tin ku keda depositá riba nan kuenta di spar di Òinki. Esaki netamente ta pa siña nan e importansia di ta un spardó.

Girobank huntu ku Òinki ta yama danki na kada un mucha i mayor ku a partisipá na e evento aki i alabes ta felisitá tur mucha ku a kai den premio. E potrètnan di e karanan kontentu athunto ta papia pa nan mes. Ku esaki Girobank ta sigui demostrá ku e ta komprometé ku hubentut i nos komunidat.