Willemstad –Girobank ta dekretá luna di òktober 2015 komo luna di spar i lo pone èkstra atenshon na e importansia di spar den e luna aki. Pa klousura e luna, Girobank ta organisá riba World Savings Day, 31 di òktober un tremendo ‘Oinki Super Savers Hunt’ pa nos muchanan.
Girobank semper a sa di motivá i enkurashá su klientenan riba e tereno di spar. Ku kampañanan manera ‘Live Your Life Forward’ i ‘SAM den kaya’, Girobank ke stimulá pueblo di Kòrsou di wak pa dilanti i spar pa momentunan memorabel den nan bida. Netamente den e luna aki di òktober ku World Savings Day lo tuma lugá Girobank ke para èkstra ketu na e importansia di spar.
World Savings Day a wòrdu nombrá na 31 di òktober 1924, durante e promé kongreso internashonal di Savings Bank na Milano. Aktualmente no ta pone hopi atenshon na e dia aki i Girobank a mira esaki komo un bon oportunidat pa selebrá i alabes klousura nos luna di spar ku un aktividat pa nos muchanan.
Oinki su Super Savers Hunt ta un ‘scavengers hunt’ ku Girobank ta organisá pa tur mucha entre 6 pa 12 aña di edat. Pa partisipá na Oinki su Super Savers Hunt bo tin ku forma un tim di 3 mucha i un adulto. Un kondishon importante ta ku un mucha den e tim mester ta un spardó di Oinki.
Pa partisipá na Oinki su Super Savers Hunt ta kompletamente grátis i lo bai tuma lugá den nos bunita sentro di suidat Punda, na pia nos muchanan lo tin ku bai hasi diferente ehersisio i duna kontesta na preguntanan. E hunt lo konsistí di dos kategoria, un pa muchanan di 6 pa 9 aña i 10 pa 12 aña, esaki pa tene e ehersisionan i preguntanan na nan propio nivel.
For di promé di òktober te ku 21 di òktober por pasa na un di nos branchnan pa inskribí pa Oinki su ‘Super Savers Hunt’. Tambe por hasi inskripshon via di nos wèpsait www.girobank.cw. Tene na kuenta ku lugánan ta limitá, pues inskribí mesora! Pa mas informashon di Oinki su ‘Super Savers Hunt’ bishitá nos wèpsait òf página di Facebook.
Oinki i Girobank ta hasi un yamada na tur Oinki Super Savers, nan amiguitunan i mayor di Kòrsou pa djòin nos den e selebrashon di World Savings Day ku un tremendo Super Savings Hunt dia 31 di òktober próksimo.