Willemstad – Durante di e wikènt tras di lomba GiroCares, e fundashon di boluntario di Girobank, konhuntamente ku CuracaCares a tene un Clothing Drive. E meta di e Clothing Drive aki ta pa kolekta paña nobo òf segunda mano den bon kondishon pa por duna bek na esnan ku mas mester di dje den nos komunidat. Un total di 31.800 kilo di paña, sapatu i asesorio a keda kolekta. Esaki ta surpasá tur espektativa di GiroCares. E Clothing Drive a start sali for di djabièrnè mainta na ofisina prinsipal di Girobank kaminda GiroCares a tene su  Clothing Drive pa tur empleado, i asina duna un bon ehèmpel. Trahadónan di Girobank a kontribuí grandemente dunando mas ku 2500 kilo di paña. Tambe ta bon pa remarká ku e proyekto aki ta wòrdu kargá kompletamente pa trahadónan di Girobank huntu ku organisashon sosial i klùpnan ku ta duna servisio na komunidat. Durante e Clothing Drive ku a tuma luga djasabra ultimo un total di 29.300 kilo di paña, sapatu i asesorio a ser kolekta. E pañanan ku a keda kolekta durante di e Clothing Drive, lo wòrdu surtí, labá, drechá i suministrá di puntuashon, kla pa drenta e GiroCares Thrift Store. Via di instansianan sosial GiroCares lo invitá tur esnan ku por duna e pañanan aki un bon uso i un segundo oportunidat. Esnan ku lo bini lo risibí un kantidat di punto pa asina por ‘kumpra’ den e GiroCares Thrift Store. E tienda lo ta un lugá agradabel pa shòp. E idea ta pa riba e dia aki e invitado tin un dushi eksperensia di kompra. E tienda lo ta pa tur edat i tur sekso. GiroCares ta wak bek riba un evento sumamente eksitoso. Pueblo di Kòrsou a uni huntu pa duna en grande i asina demonstrá ku nos ta un pueblo ku un kurason sumamente grandi i positivo. Pa esaki Girobank i GiroCares i tur sobra partners ta yama un danki kaluroso.