Grupo L’Ambiance ta presenta …
WILLEMSTAD.- Grupo di Karnaval L’Ambiance ta pendiente pa su partisipashon na Karnaval 2016 i den kuadro aki ta organisando dos tremendo fiesta ku presentashon eksklusivo di ‘O.K. band – Organisashon Kompleto’. Ta despues di 10 aña ku Organisashon Kompleto ta bolbe presenta i for di momentu ku e informashon aki a bira konosí ela perkurá pa krea un espektativa hopi grandi pa ku nan presentashon. Spesialmente pa e okashon aki a reuní tur e músikonan ‘original’ di Organisashon Kompletu pa e dos presentashonnan aki. Pa hasi esaki no tabata fásil, kada músiko tin nan agènda i ta despues di deliberashon a logra pa haña un wikènt ku e músikonan lo por uni pa presenta.
‘GLAMOUR & SPICY’
E promé fiesta ku L’Ambiance ta presenta ta ‘Glamour & Spicy’ ku lo tuma lugá dia 30 di òktober 2015 den Rust & Burgh. Spesialmente pa e okashon aki Rust & Burgh lo keda kombertí den un sala glamuroso. Pa e anochi aki Organisashon Kompleto lo presenta huntu ku ERA i Happy Peanuts. Dj Leannon i dj Renzo ‘Pepito’ Petronia lo perkurá pa e animashon durante di kambio di banda. Karchi pa ‘Glamour & Spicy’ ta optenibel na Mensing’s Caminada i na Beep Beep na rason di 45 florin. Lo tin un sekshon di VIP. Pa mas informashon pa e sekshon di VIP bo por yama 524-8838 òf 516-7181. Fiesta ta kuminsá for di 9’or di anochi i lo terminá 3’or di mardugá. Trahe pa e anochi aki mester ta ‘Glamuroso’.
‘HALLOWEEN MOJITO PARTY’
E klup nokturno ‘Blue Marlin’ situá na Zuikertuin Mall lo ta e sitio pa e di dos presentashon di Organisashon Kompleto ku lo tuma lugá riba djasabra, 31 di òktober 2015. Pa e ‘Halloween Mojito Party’ lo tin presentashon di O.K. i ERA Outentiko ku su front forma pa Boy, Tico, Moises, Lio Rosa i nan sekshon di brass. Dj Leannon i Renzo Petronia tambe lo forma parti dje tremendo fiesta aki. Pa e anochi aki preis di entrada lo ta 25 florin i ta optenibel na Mensing’s Caminada i Beep Beep. Grupo L’Ambiance ta invitá fanátikonan di O.K. – Organisashon Kompleto i pueblo di Kòrsou en general pa bin disfrutá di e re-enkuentro di un dje mihó bandanan di Kòrsou pa loke ta trata presentashon, kalidat i variashon musikal.