ORANJESTAD – Gobierno di Aruba a dicidi cu ta otorga e permiso pa organisa carnaval 2015 na Aruba na e fundacion SMAC (Stichting Movemento pa Aruba su Carnaval). “Despues di reunion di Promer Minister y mi persona hunto cu Gruponan di Carnaval, a yega na e decision cu lo otorga e permiso pa organiza Carnaval 2015 na SMAC”, minister di cultura Otmar Oduber a pone riba su pagina di facebook diaranson merdia. Segun Oduber, e decision aki ta” teniendo na cuenta e interes y exito di nos fiesta cultural di mas grandi”. Di parti di e fundacion SAC (Stichting Arubaanse Carnaval), presidente Tecla Kelly a reacciona cu ‘nos no a tende nada oficial ainda’, pero cu esaki ta haci nan caminda pa corte ‘mas facil’. Despues cu e Grupo Uni a bisa  den fin di siman cu nan no ta participa mas y a manda un carta pa prome minister Mike Eman cu e mensahe ey, diaranson cos a cambia ora cu nan a wordo yama pa un reunion diaranson merdia 12:30pm. Tabata conoci for di dialuna cu cos no tabata sinta bon serca gobierno y cu lo mester a discuti cu polis y SAC, kico ta e siguiente paso. SAC a reuni cu mando di polis dialuna ultimo, pero partidonan no a yega mucho leu. Polis a bisa SAC cu nan tin e permisonan firma caba, pero no por duna nan ainda pasobra ‘gobierno no a aproba esaki ainda’. SAC a declara despues cu polis a bisa nan cu ‘tur permiso ta firma pa nan’ pero cu ‘gobierno tine wanta’. Cu e decision nobo aki, tin indicacion cu e caso aki lo termina dilanti mesa berde, manera cu SAC a splica anteriormente. No ta conoci kico a conduci Grupo Uni pa cambia di postura y ni tampoco kico a convence gobierno pa duna SMAC e permiso, despues cu nan a pidi gobierno pa duna SAC tur cos. E foto ta di e fundacion Grupo Uni, despues cu nan a bandona e reunion cu gobierno, diaranson merdia.