WILLEMSTAD- 31 di mart 2014:- Durante di un rueda di prensa ku a tuma lugá dia 31 di mart,  Ofisina di Turismo di Kòrsou (CTB) a duna informashon tokante grabashon di un novela di un kanal di Brazil kual lo tuma lugá aki na Kòrsou. E grabashonnan lo start djaluna 31 di mart i lo terminá dia 9 di aprel próksimo. Ta importante pa informá ku lo bai sera algun kaya durante grabashon di e novela. E kanal di televishon Rede Record di Brazil lo bin graba parti di un novela aki na Kòrsou. Ta trata aki di e di dos kanal mas grandi na Brazil. E novela lo wòrdu mira pa aproksimadamente 59 mion persona na Brazil mes i mas di 200 mion den e 150 paisnan kaminda e kanal su transmishon ta yega. Titulo di e novela ta “Vitoria”. E kuminsamentu di e novela lo konsentrá riba e imágennan graba na Kòrsou. Durante di e diferente episodionan lo interkambiá entre partinan graba na Kòrsou i na Brazil. Transmishon di e novela lo start luna di mei próksimo na Brazil. E novela lo tin un durashon di aproksimadamente 8 luna. Pues durante un temporada basta largu lo bai keda mira imágennan di Kòrsou riba pantaya di televishon na Brazil. Na mes momentu CTB lo hasi promoshon riba wepsait di e kanal ku tin un promedio di 29 mion bishitante pa luna. E grabashonnan na Kòrsou lo inisiá dia 31 di mart i lo terminá dia 9 di aprel. Lo bai graba den aria di Otrobanda, Punda, Curaçao Sea Aquarium, diferente playa entre otro Knip, Santa Barbara Plantation i riba brùg Emma. CTB ta konta ku koperashon di komunidat na momentu ku polis lo sera kaya pa e grabashonnan por tuma lugá.