ORANJESTAD – Renaissance Convention Center (RCC) diahuebs ultimo tabata anfitrion di e apertura oficial di Conferencia Anual di Turismo di Aruba 2014 (CATA). Durante di e apertura tabata tin presentacion di, CEO di ATA Sra. Ronella Tjin Asjoe-Croes, representante di Aruba Convention Bureau Sra. Jerusha Rasmijn, representante di Imagen Digital Sr. Edgar Camilo Plazas, representante di MDE Consulting Group Sr. Manuel Caro, presentado di Cli-Max na canal di television internacional NTN 24 HORAS Sra. Harriet Hidalgo y Sr. Freddy Vargas Ministerio di Energia di Aruba. Minister di Turismo y Transporte Sr. Otmar Oduber tambe a haci su acto di presencia pa asina completa e lista di personanan cu a presenta. Pa duna un toque cultural a entretene tur presente cu un baile tipico presenta pa Popcorn Dancers. Despues di e apertura oficial e grupo di invitado VIP a bishita LG Smih’s Steak & Chop House pa un delicioso lunch den un ambiente ameno. Tur presente a haña oportunidad di cera conoci cu e Chef Cook nobo di LG Smith’s; Kelvyn Garcia y alabes a admira e interior completamente renoba di restaurant ubica riba e di dos piso di Renaissance Mall. Na final di e lunch a sigui pa un Scavenger Hunt den Jeep cu a wordo organisa dor di Aruba Tourism Authority (ATA).  Entre esunnan cu a hospeda den Renaissance Resort Aruba pa acudi na e apertura di e conferencia ta Carnival Tours di Argentina, Maral Turismo di Paraguay, Fakino Turismo di Venesuela, Lantours di Chile y hopi mas. LG Smith’s Steak & Chop House y Renaissance Resort Aruba por mira bek riba un exitoso apertura di CATA 2014.