Willemstad; E di dos edishon di e Festival di Jump IN na Korsou HAK’E ta kla. Ku un line up di banda nan netamente lokal HAK’E un biaha mas ta pinta di ta un eksito rotundo. Dia 18 di Februari awo na e parkeerplaats di Sambil, HAK’E lo konta ku presentashon di: GIO ’93, Doble R, Vega, Happy Peanuts, Gentz, Dreams, Era, Dolce i Score. Un total di 9 agrupashon musikal ku lo presenta un tras di otro for di 7or di anochi te ku 3or di marduga sin interupshon di DJ. E anochi lo kuminsa ku DJ RO1 huntu ku MC Chris Strick pa después unu tras di otro e agrupashonan musikal presenta riba 3 diferente tarima. Un konsepto ku sigur a dal masha duru mes den 2016.

E anja aki por bisa ku ta un toke sumamente great ora ku bo hanja Doble R riba tarima después di basta tempu den un Jump In. Nos tur ta korda “E trein” i tambe “Dinosauro”. Ta un honor pa HAK’E por anunsia GIO ’93 su presentashon durante e anochi. No tin mester di muchu palabra pa deskribi loke Urvin “Luwi” Yano, Tico Libie i Gibi Doran por hasi ora nan ta huntu den front di GIO. E dos agrupashonan musikal aki lo ta nobo pa e anja aki banda di e otro agrupashonan ku anja pasa nos por a eksperensia ki ambiente nan a buta.

Estreno mas Wepa organizado di e festival aki di e forma aki ta duna aporte konsiderablemente na nos artistanan lokal i albes ta rekouda fondo pa e grupo di karnaval Estreno Mas Pikete.

Kaarchi pa e Festival aki ta kosta ANG 55,00 ku ta inklui bo petchi. Karchinan ta obtenibel na Mensing Caminda, Beep Beep, Sambil, miembronan di Estreno Mas Pikete i tur eks miembro di WEPA.

E petchi di HAK’E ta obligatorio pa wordu bisti pa por drenta e festival i durante di e festival. Ta nifika ku pa bo por drenta e festival bo mester tin bo kaarchi na man i tambe bo petchi bisti. Si bo tin bo kaarchi i bo no tin bo pechi di HAK”E lo bo no por drenta e festival. Lo reparti e pechinan di HAK”E djasabra di 18 di Februari 2017 di 9or di mainta pa 3or di atardi na SAMBIL.

HAK’E, un konsepto di 8 ora largu di musika bibu trese pa 9 diferente agrupashonan musikal, den un espasio di 360 grado di sonido i effektonan di lus, ku tres diferente tarima ta garantía pa un anochi karnavalesko ku hopi ambiente di Tumba i Roadfire.

HAK’E ta gradisi tur musiko i artista pa nan kolaborashon pa hasi e Festival aki un eksitoso i tambe ta gradisi su partnernan Sambil, Amstel Bright, Massive, Gijbels Renting  i Coca Cola pa nan aporte. Di parti di Esrtreno mas Wepa un felis karnaval i danki di antemano pa kada unu di bosnan su aporte.

Estreno mas Wepa, HAK’E