Hebbe Hebbe y Cerbes Chill ta anuncia: Un baluarte di Carnaval

ORANJESTAD, Aruba – Januari 2016: Diahuebs awo Maria Lydia “Mani” Lopez lo ricibi un bunita reconocemento di e team y sponsornan organisado di Hebbe Hebbe 2016. Mani Lopez ta un baluarte di Carnaval di Aruba, kende no solamente a lidera gruponan y organisacionnan di Carnaval, pero tambe tabata e persona responsabel pa introduci e musica, ambiente y alegria di Carnaval na miles y miles di turista. Den transcurso di 44 aña, Mani Lopez a traha cu energia positivo y entusiasmo grandi; cu hopi pasion el a haci su maximo esfuerso pa envolve no solamente hende grandi, pero principalmente nos muchanan den Carnaval. Na momento di e anuncio oficial di su persona como e baluarte cu ta dedica Hebbe Hebbe 2016 na dje, Mani Lopez a expresa su gratitud pa e honor grandi aki, gradici y contento cu hendenan ta corda riba dje. El a agrega cu e temporada cu el a pasa dedicando na Carnaval tabata un tempo hopi bon y contento den su bida. E trabao di grupo tabata hopi pisa, pero cada biaha atrobe, e ta lubida tur e esfuersonan pisa ora cu e mira e grupo riba caminda ta baila y gosa cu disfraznan bunita y alegre.

Su unico lamento ta cu awendia por nota cu tin poco mucha ta bay den Carnaval compara cu tempo nan a lanta e prome gruponan pa mucha y e ta algo cu e ta desea di mira crece atrobe. Pa 18 aña largo, for di aña 1984 ora cu hotelnan a acerca Mani Lopez pa organisa shownan di Carnaval pa e turistanan, el a biba y fiesta Carnaval tur anochi, tur dia, tanto na hotelnan high rise como hotelnan low rise. No tabata importa si ta dia di fiesta, Bierna Santo of Pasco, tur dia Mani Lopez y su grupo tabata traha y keda disponibel pa introduci Carnaval di Aruba na nos bishitantenan, invitando nan pa bolbe pa e experiencia completo despues. Esaki tabata un tempo hopi contento cu hopi recuerdo bunita pa Mani Lopez. Manuel Da Silva, como organisado di Hebbe Hebbe a elabora riba e relacion di Mani Lopez cu Carnaval. Na aña 1952, esta prome cu a funda SAC ya a scoge Mani Lopez como Reina di Miramar Social Club. No tabatin parada oficial di Carnaval, pero si tabata organisa un recorido cu jeep den cayanan di Playa. Na 1954, Mani a participa na e eleccion di reina di Club Estrella.

A pasa algun aña y na 1972 Mani a organisa su prome grupo di mucha, unda cu Debby Angela, kende actualmente ta Hues, a wordo scogi pa Reina Infantil di e grupo. Nan a gana e premio di Grupo di Aña. Como cu ainda na 1983 no tabatin mucho grupo di mucha, Mani, hunto cu un comision consistiendo di John John Flemming y Atan Lee, entre otro, a trece ocho grupo hunto den Santa Cruz, incluyendo Connie Francis y Trappers y a organisa un parada cu e tema Mundo di Flor. Durante di e tempo cu e comision aki tabata organisa eventonan di Carnaval den e districto di Santa Cruz, nan a saca tres Reina di Carnaval di Aruba tras di otro: Maristella Geerman na 1984, Wendy Geerman na 1985 y Dalilah Geerman na 1986.  Maristella Geerman tabata e prome Reina pa “bay stadion” cu un show di Carnaval. Entre 1984 y 1992, Mani Lopez y Divi Divi Carnaval Dancers a promove Carnaval cu nan bunita shownan na tur hotel y na diferente actividad pa turista. Despues di 44 aña activo den Carnaval di Aruba na aña 2002, Mani Lopez a dicidi di retira pa motibonan personal.