HET ACHTERTUINTJE A HABRI SU PORTANAN NA ZUIKERTUINTJE


Un restorant ku un konsepto diferente den e mundu di Horeca

Djabièrnè último restorant “Het Achtertuintje” a habri su portanan den e área di Zuikertuintje. Ta trata di un restorant ku un konsepto diferente kaminda hopi atenshon ta ser poné riba nos medio ambiente i naturalesa. Kuminsando for di e lokalidat ku ta situá banda di un bunita hòfi, ku mata i para, te ku nan mobilario ku ta traha di palunan resiklá. “Het Achtertuintje” no ta solamente un restorant, pero manera e nòmber mes ta bisa, e ta un “cocktail lounge” ku un terasa natural, kaminda bishitantenan por bin sinta relahá i miéntras nan ta disfrutá sea di un “Frozen House Cocktail”, un kòfi speshal òf un dushi pasa boka, nan por sinta mira i skucha e diferente paranan ta kanta den e bunita hòfi ku ta rondoná e terasa.

Speshalidat di “Het Achtertuintje”

E speshalidat di “Het Achtertuintje” ta e diferente tipo di “Frozen House Cocktails” ku e ta sirbi. For di mashinnan speshal, ta sirbi e diferente cocktail frozen na e klientenan.  Nan “Frozen House Cocktail” ta Huricane, Tropical Desire, 20 Thousand Volts, Blue Smurf, Toxic Banana, Strawberry Daiquiri i Panty Dropped. Tambe nan tin nan “Classic Frozen Cocktail” manera Mojito, Margaritha Caipirinha ku Brazilian Rum, Amaretto Sour  òf nan “Premium Frozen Cocktails” manera Margaritha Achtertuintje, Romeo and Julieth, Mangotini i Appletini. Nan kushina ta internashonal ku menu tantu Oropeo komo Merikano. Despues di un dushi kuminda por disfrutá di un dushi “Crème Brulee Krioyo”, un “Tres Leche Flambiá” òf un Tiramisú Italiano. Despues di e postre por saboriá un dushi “Toast Almond  Coffee” ku un poko di Amaretto òf Frangelico, un “French Coffee” ku Grand Marnier òf Kahlua òf simplemente un kòfi pretu.

Medio Ambiente

Den konstrukshon di “Het Achtertuintje” a trata di uza mas tantu posibel materialnan ku bo ta haña den nos medio ambiente. A purba di mantené tambe e hòfi den su forma natural ku tur e mata i palunan den dje, ku ta forma kas di e diferente paranan ku henter dia ta kontentá e bishitantenan ku nan bunita kanto. Meskos ku e prikichi  i loranan ku tambe tur dia ta bin kibra e silensio ku nan kanto di alegria. Pa lokual ta e mobilario, a uza palunan resiklá, manera palunan di palèt, palunan kitá for di kaha òf palu ku nan a haña bentá kantu di laman. For di esakinan a traha e diferente mesa i stulnan ademas a konstruí un bunita balustrada pa dekorá e  terasa ku n’e i e otro mobilarionan ku ta ser uzá den e terasa. E filosofia di “Het Achtertuintje” ta, pa su bishitantenan por bin disfrutá di un momentu agradabel, relahá, disfrutando di e bunita naturalesa ku su terasa ta ofresé, rondoná ku palu di mata i paranan ku ta kanta.

Orario di “Het Achtertuintje”

‘Het Achtertuintje” ta habri di djaluna te ku djasabra di 11’or di mainta pa 3’or di mardugá. Nan ta ofresé almuerso parti mèrdia, di atardi pa anochi nan ta sirbi dinner i den oranan lat di anochi nan ta sirbi nan “nite bite”. Djadumingu ta sera. DSC_4566Pa reservashon di gruponan por yama telefòn 664-4008 òf 738-1800. “Het Achtertuintje” ta riba Facebook tambe.