WILLEMSTAD- 26 yüni – Manera ya tur hende ta na altura ta preparando pa e sertámen di Miss Teenager Curaçao 2013, den preparashon pa e sertámen di e aña aki a pone hopi énfasis riba proyektonan pa nos komunidat. Den kuadro di esaki a duna un aporte spesial na ‘Stichting Do Blue’ pa kual e partisipantenan mester a hasi un kolekta na Albert Heijn Supermarket i durante  e aktividat di Miss Dushi Punda ku a tuma lugar resientemente.

Durante di fin di siman tra’i lomba tabata tin un ‘Charity Auction Event’ pa yuda rekoudá fondo pa nan último proyekto nèt promé ku e elekshon final. Partisipantenan a haña enkargo pa yuda algun famia di ménos rekurso den nos komunidat. Megan Trenidad, partisipante # 6, ku ya tin e títulonan di Miss Dushi Punda, Brains & Beauty, Most Dynamic i Miss Ecological, a haña na su enkargo famia Martis, ku ta konsistí di mama, tata i kuater yu ku tin nesesidat pa un kas den un mihó kondishon. Ademas di esaki e famia ta den un situashon un poko mas kompliká, ya ku nan mester sali for di e kas i pesei ku urgensia mester kuminsá traha nan propio kas. E hóben Megan Trenidad a sá di yuda e famia dor di regalá nan 100 blòki di 6 pa nan por kuminsá traha nan kas. Ademas di esaki Megan sabiendo e situashon ku e famia ta konfrontando a pensa ku e famia meresé un oportunidat pa nan tambe tin un oportunidat di pasa un ratu alegre den seno familiar, pensando riba esaki e’la regalá nan un Gift Certificate pa henter famia desayuná huntu na e bufèt di Renaissance Hotel. Di akuerdo ku e hóben Megan Trenidad, su esfuerso pa e famia aki no ta pa publisidat sino pa nos bira mas konsiente di esnan mas vulnerabel den nos komunidat. Hopi biaha nos ta mira hopi leu, lubidando ku den nos propio komunidat tambe tin hende ku tin mester di nos atenshon. Klousurando e hóben ta hasi un invitashon na un i tur pa apoyá e sertámen final di Miss Teenager Curaçao 2013 di 6 yüli próksimo. Karchinan ta optenibel serka e partisipantenan i miembronan di IBFF.