Ta lokual mas a resaltá durante Konferensia di “Youth Empowerment”

WILLEMSTAD – Resientemente, Kòrsou su Hubentut Mustrando Direkshon a tene e promé Konferensia di “Youth Empowerment”aki na Kòrsou unda a invitá hobennan di diferente area den nos komunidat pa partisipá I elabora riba preokupashon bou di hubentut I tambe e desaroyo general di nos pais relashona ku nos hobennan. Durante e konferensia aki, riba djasabra mainta I mèrdia, hobennan a indika bon kla ku nan ta sinti falta ku hobennan no por partisipa di forma aktivo na momentu ku Gobièrnu òf otro instansianan den komunidat ta tuma desishon ku despues e hobennan aki ta haña nan konfronta kune den futuro. E meta di Kòrsou su Hubentut Mustrando Direkshon primeramente tabata pa haña gruponan di hoben huntu, i skucha preokupashon di hobennan den nos komunidat. I netamente esaki a ser logra, na momentu ku a para ketu na dos topiko importante, esta Enseñansa i Ekonomia.

Algun di e aspektonan ku mas a resalta ta ku hobennan tin duda den Gobièrnu, hobennan ta kere hopi den e sistema di kooperativa, hobennan no ta haña ke sistema di ensenansa ta preparanan sufisiente bon pa drenta merkado laboral i hobennann ta konsidera entranheronan i tambe personanan indokumenta komo un menasa pa nan futuro laboral. Hobennan entre otro ke pa laga pensamentunan di 50 aña pasa un banda i laga hobennan tambe trese nan pensamentunan i asina aporta na solushon.

Mas aleu hobennan a indika ku lo por siña nos hendenan historia di Kòrsou den su profundidat. For di siklo 1 te na skol sekundario ta importante pa inkorpora den e lès aki un rekorido riba Kòrsou na e sitionan historiko. Tambe lo yuda den desaroyo di e hoben pa promove balor di nos himno i bandera. Por èhempel importansha di un palu di bandera na bo kas. Hobennan tin gana di siña mas di nos kultura, I no solamente skucha di esaki so durante Siman di Kultura,pero haña di parti di Gobièrnu mas aktividat kaminda ku ta kontribuí I laga hobennan partisipá.

Atrabes di e prome konferensia di hobennan aki, Kòrsou su Hubentut Mustrando Direkshon a kuminsa haña un bista di e nesesidat aktual ku hobennan tin pa tantu ser skucha, pero tambe pa yega na partisipashon den desishonnan den nos komunidat. Na final di e dia, kada hoben ku a partisipa a risibi un sertifikado komo muestra di su partisipashon na e dia aki. Ta e intenshon pa den luna di Oktober, tene e Segundo konferensia pa hobennan I esaki tambe lo ta gratis. Tur hoben ku ta interesa pa partisipa por manda un email for di awor na korsousuhubentut@gmail.com I registra nan mes, pa asina risibi e invitashon pa por partisipa na e konferensia. Hobennan ban tene na kuenta ku ta nos mes tin ku sali I yuda den desaroyo di nos pais pa huntu e isla por prospera.