Annie Todd ta un persona ehemplar laborando na PAAZ

Pa luna di september, Dr. Horacio E. Oduber Hospitaal a scoge ziekenverzorgende Annie Todd como Empleado di Luna y gerencia di Hospital hunto cu su coleganan di PAAZ a dun’e un fabuloso sorpresa pa e ocasion aki. Sra. Renata van Dongen, kende ta Zorgmanager na PAAZ, a laga sa cu Annie ta un persona hopi importante pa PAAZ. E cantidad di añanan di dedicacion na e profesion di enfermeria, e pasion pa su trabou y su experiencia cu diferente tipo di pashent ta puntonan fuerte di Annie, segun su hefe. Pero, mas importante ainda, ta loke e por y loke e por siña y comparti cu su coleganan mas hoben. E ta trata su pashentnan teniendo semper den mente e persona completo, integral, sra. van Dongen a splica. El a bisa cu Annie tur ora ta corda su coleganan semper pa considera tur factor, tanto psicologico como fisico, ora cu nan ta trata cu nan pashentnan. Esaki ta hopi importante pa PAAZ, el a agrega. Annie Todd ta un persona amabel y hopi stima entre su coleganan y nan a percura pa un tremendo sorpresa. Su ruman homber, kende ta traha tambe como enfermero na PAAZ, a haya masha reclamo di su parti pa no a avis’e cu su coleganan ta preparando algo di surprise p’e. Annie a bisa danki na su coleganan pa tur e añanan como bon colega y mas cu tur cos, pa nan amistad. El a bira un poco emocional, como cu e ta bahando cu pensioen pronto, y despues di tanto aña di dedicacion lo sinti un falta inmenso di su trabao, e contacto diario cu su coleganan y, naturalmente tambe di su pashentnan. El a gradici di curason tur esunnan presente pa e gesto asina bunita cu el a ricibi. Di parti di gerencia di Hospital tabata presente sr. Ezzard Cilie, kende ta director medico di Hospital. E tambe a yega di traha cu Annie Todd y a gradici’e cu entusiasmo pa su excelente cuido y servicio, pa su compromiso grandi cu semper el a demostra.