Cadushi ta sigui dal bai ku su tradishon

WILLEMSTAD – Esnan ku ta praktiká e deporte di badminton di forma organisá ya ta preparando pa e fin di siman di dianan 12, 13 i 14 di desèmber ora e klup Cadushi ta kontinuá ku e tradishon pa organisá e asina yamá ‘Kerstbouten toernooi’, e biaha aki repartí entre e kanchanan di SDK i Rust en Burgh. Te i ku dia 3 di desèmber por inskribí. Cadushi ta prepará e torneo kaminda hungadónan di badminton den e klasenan A, B i C, tantu femenino komo maskulino, por midi forsa i táktika riba kancha. Tin wega singular, pero tambe dòbel miksto i dòbel maskulino òf dòbel femenino. Partisipashon ta kosta 10 florin pa persona pa tipo di wega den e kategorianan C i B, i 15 florin pa persona den kategoria A. Por inskribí serka e klupnan i e miembro di direktiva di Cadushi John Amarica (bccadushi@gmail.com) pa mas tardá dia 3 di desèmber awor. Hungadónan di badminton di otro isla i pais den region òf di fakansi, manera for di Hulanda, tambe por inskribí pa partisipá. Djabièrnè dia 12 i djasabra dia 13 di desèmber e kompetensia ta tuma lugá den e sala di deporte di SDK na Brievengat i e weganan final riba djadumingu 14 di desèmber ta riba e kanchanan drechá basta mihó di Asiento na Rust en Burgh.