Willemstad- Resientemente Gobièrnu di Kòrsou a instalá un komishon multidisiplinario ku ta traha riba un maneho nobo pa deporte.
En konekhon ku esaki sra. Minister M. Alcalá-Wallé, a instalá ofisialmente e grupo di trabou ku a keda enkargá ku e tarea pa traha riba revishon i aktualisashon di e Manehó di Deporte.
E grupo di trabou menshoná ta konsistí de representantenan di FFDK, FDOK, SSC, Ministerionan di ESKD, GMN, SOAW, MEO, VVRP, Finansas, Hustisia i un konsehero independiente den persona di sr. I. de Windt.
Ta importante pa suprayá ku moveshon i un bida salú ta importante i ta imperativo pa e ta integrá komo materia den nos skolnan. Ademas di esei mester tin sufisiente infrastruktura disponibel pa entrená.

Tambe ta importante pa pone enfoke riba e empeño di Gobièrnu pa hasi Kòrsou e isla di deporte den Karibe.
Tarea di e grupo di trabou ta konsistí di entre otro, vigilá pa tur “stake-holder relevante ta enbolbí den revishon i desaroyo di e maneho di deporte. Duna direkshon, kontenido i supervisá e proseso. Evalua i raportá i tambe sòru pa un bon interkambio di informashon entre tur partido enbolbí, mundu di deporte lokal i Gobièrnu di Korsou.

E grupo di trabou ta reuní riba un base frekuente pa asina logra yega na e proposishon pa un maneho deportivo nobo.