Riba vuelonan den region ku distansha kòrtiku mester wòrdu kobra ménos impuesto
Willemstad, Kòrsou. Aktualmente Aerolinianan y pasaheronan ta wòrdu kobrá fuera di proporshon ku gastu y impuesto, ku konsekuensha ku preisnan di ticket ta siguí subi i ku ta okashoná un bahada den e kantidat di yegada na aeropuerto. InselAir ta sostené e polítika ku ta wòrdu hiba pa diferente pais, entre kua Brasil, pa stimulá tráfiko aéreo den region. Na momento di kobransa di gastu y impuesto tin distinshon entre vuelonan regional y internashonal. Pa e vuelonan regional, 70% ménos impuesto ta wòrdu kobra ku ta resultá na preis nan di ticket mas abou. Un sistema asina lo ta bon pa e área di Caribe. Preisnan lo baha y lo surgi un oumento den tráfiko aéreo regional.
Tur hende tin derechi di bula
“E polítika regional mester konta pa vuelonan entre e isla nan ABC y Sint Maarten, tur den reino Hulandes’, segun Heerenveen. ‘Pasaheronan ku ta sali for di Aruba ta paga USD 34.25 pa un vuelo internashonal di 9 ora pa Amsterdam y pasahero riba un vuelo den region di 25 minüt, di Aruba pa Kòrsou, ta paga e mes un montante!’ segun Heerenveen, Chief General and International Affairs di InselAir. InselAir ta ofresé transporte aéreo pa tur hende. Tur hende tin derechi riba ticket pagabel, no opstante nan entrada. Esaki ta difísil pa realisá mirando e gastunan y impuesto haltu di gobièrnu. Aparte di esaki tin diskrepansha den e impuesto nan ku a wòrdu implementá; Kòrsou-Aruba/Sint Maarten: USD 20, Kòrsou-Bonaire: USD 10 y Aruba-Kòrsou: USD 34.25. Tin rumor ku e impuesto di salida na Kòrsou lo oumentá atrobe. Ofresiendo nos speshal nan un par di bia pa aña y ofresiendo tarifa nan “Last Minute” riba nos website, InselAir ta hasi biahamentu posibel pa tur hende. ‘Esaki ta bai a kosto di nos propio márgen,’ Heerenveen ta stipulá. ‘Pero nos ke keda aksesibel pa tur hende y p’esei semper nos tin un kantidat di asiento disponibel na un tarifa hopi abou,’ Heerenveen ta terminá.
Ehèmpel Kòrsou-Aruba
Un ticket di Kòrsou pa Aruba ku un Fokker 50 ta kuminsá na Ang. 376 (268 Ang base-fare + 108 Ang impuesto y gastu), di kua 30% ta konsistí di impuesto y gastu. Si nos uza un modèl Brazilero den e region aki e preis di ticket lo a sali sigur 15% mas barata, kua ta Ang 320. Un diferensha grandi di Ang 56. Den e ehèmpel aki nos a tene kuenta solamente ku e impuesto di salida y e gastu di Air Traffic Control kua na Brazil ta muchu mas abou pa vuelonan regional. ‘E gobièrnunan konserní den Caribe ta reklamá ku e tráfiko aéreo regional ta birando ménos, miéntras ku esaki ta konsekuensha di e polítika ku nan mes ta hibando,’ segun Heerenveen. Heerenveen ta kontinuá bisando, ‘E ehèmpel duna anterior ta mustra ku pa kada ticket Ang 109 (30%) ta bai pa gobièrnu y di e Ang 267 (70%) ku keda tin ku wòrdu parti den kompania nan di Passenger Handling, sistema di reservashon (GDS), fuel, seguro, finansiamentu, gastu di credit y debit card, komishon pa Travel agent, mantenshon, loonbelasting, SVB, penshun, security, avionnan, salario, hür di check in counter na diferente destinashon (kual den sierto kaso manera Aruba ta inkluí den e impuesto di salida y kual na Hato e aereolinea nan mes mester paga esaki), catering y hopi mas. InselAir ta hasi tur e trabou y ta riska di keda ku solamente 2-3% di e total, kua mester wòrdu hinka direktamente bek den e kompania,’ Heerenveen ta finalisá. Apesar di tur e subidanan ku InselAir ta haña su mes konfrontá kuné, e ta keda mantené preis nan rasonabel. Bulando ku InselAir di Kòrsou pa Bonaire pa e preis di mas abou ta sali mas barata (Ang 183, excl. Impuesto, ida y buèlta) ku bai ku un taxi (ida y buèlta) pa Santa Barbara Resort, loke ta kosta aproksimadamente Ang 234 (esta 2 x 65 USD). Un taxi lo keda ku mas ganashi ku e 2-3% (Ang 3.70-5.50 p/p) ku InselAir ta sobra. Den 2014 InselAir a paga mas ku 30 mion florin di taxes i charges na gobièrnu i otro entidatnan na Kòrsou ku ta probechá de eksistensha di InselAir i su pasaheronan.
Gastu di mantenshon
E mantenshon obligatorio ku ta sosodé periódikamente na e avionnan ta wòrdu determiná a base di e kantidat di ora di vuelo òf e kantidat di siklo (subida + aterisahe = 1 siklo). Esaki ta nifiká ku un avion ku ta bula entre Kòrsou y Bonaire apesar ku e vuelo ta dura solamente 15 minüt ta forma 1 siklo, miéntras un avion ku ta bula entre Kòrsou y Sint Maarten (aprox 80 minüt) tambe ta forma 1 siklo. Esaki a wòrdu stipulá asina paso e motibu di mantenshon ta wòrdu okashoná pa gran parti dor di subida y aterisahe di e avion. InselAir ta hasi hopi vuelo entre e islanan i p’esei e gastunan di mantenshon ta 3 pa 4 bia mas haltu relativamente kompará ku vuelo nan mas largu pa destinashon nan manera Miami y Charlotte.
Uso di kombustibel
Laga nos tuma Kòrsou-Bonaire (Ang 217, ida y buèlta, inkluyendo impuesto) komo ehèmpel; e gastu nan di kombustibel pa ticket (pa persona) ta aproksimadamente Ang 10 (ida y buèlta, saliendo di un okupashon di 80%), kual ta 4.6% di e preis di ticket. Riba vuelo nan kòrtiku (15 min pa Bonaire) e Fokker 50 no ta gasta asina tantu kombustibel. Mirando e bahada den preis di gasolin, esaki ta tres kuné un benefisio di Ang 3 pa pasahero por ehèmpel un ticket di Kòrsou-Bonaire lo bira Ang 214 enbes di Ang 217. Esaki ta un frakshon di e preis total di un ticket riba ruta kòrtiku. Esaki ta fuera di proporshon pa ku e subida nan konstante y agregashon di gastu y impuesto kua InselAir tin ku paga loke ta pone e preis di ticket subi konstantemente.