Willemstad – Djarason mainta aproksimadamente 09:55 AM a tuma lugá un insidente na eskala chikí ku un avioneta no-komersial típo Cessna 172 ku tabata move riba pista di Curaçao International Airport riba velosidat abou. Ta trata di un avioneta chikí ku normalmente ta wòrdu usá pa entrenamentu di buelo. Despues ku e avioneta a aterisá normal i tabata pasa riba pista riba velosidat abou, pa motibunan aun deskonosí esaki a move den direkshon di yerba i a para den esaki. No tabatin herido. Segun e proseduranan pa loke ta trata insidente i emergensha, Brantwer di CAP mes ora a move pa e sitio pa duna asistensha. CAP a notifiká Outoridat di Aviashon Sivil di Kòrsou (CCAA) di e insidente i e Outoridat a hasi investigashon na e sitio. Despues e groundhandler enkargá ku e avion a tuma e akshonnan nesesario pa kita e avion. Pa loke ta trata daño na e pista, según evaluashon preliminar solamente un lus a kibra i esaki lo wòrdu drechá mes ora. E insidente no a afektá e operashon na aeropuerto òf buelonan.